تابع جديد الموقع

منعطف تاريخى فى حياة حلاميزو…..!

“عاش حلاميزو مع عمه دكشى وابن عمه الشندويلى والست ام الشندويلى ثمان سنوات بين حنية عمه وجسوة ام الشندويلى عليه ولكن حلاميزو كان يرد هذه الجسوة بالمجالب اللى كان بيعملها فيها.

فكان حلاميزو مشهور فى الكفر بالمجالب.. فكانوا يسمونه هناك حلاميزو مجالب بس كانت مجالب جميلة جوي مفهاش مخاطر وكان بيجيب مجالب غريبة.الصراحة محدش يعرف بيجيبها منين(ابن جنية بجى)
فكان حلاميزو طيب جدا يحبه الناس ما عدا الحرباء ام الشندويلى وغير ذلك كان حلاميزو مشهور شاهيته المفتوحة علطول فكلما راته ام الشندويلى ياكل كتير كدة تتغاظ
وتجول لعم دوكشى بص يا
راجل الواد بياكل ازاى!! فيحمر وجهه ويجول لها مالك يا ولية يا خرفانة انتى ,ماتسيبى الولد ياكل, فجالت له ما هو لو بياكل بس ماشى بس دا بيزلط

. فكان يتركها وهو يقول يارب ارحمنى من الولية ام سحلول دى
, ففى يوم من الايام سمع حلاميزو الولية ام الشندويلى وهى بتشكى لدكشى من كتر اكله كان سعتها بياكل بسبوسة بالجشطة كان جايبها عم دكشي من عم سمعة الحلاوانى,
المهم طلع حلاميزو من جيبه كيس فيه بودرة ووضع شوية على البسبوسة وجالها تعالى يا ام شندو(لا دا اسم الدلع)

انا شبعت كملى البسبوية ,جالتلو هو انت بتشبع خالص

,جالها دانا بعمل رجوم(رجيم يعنى)جالتله ايه الى انتا بتجوله ده الحج يا دكشى ابن الجنية بيشتمنى, جالها العم دكشى يا ولية با جاهلة الرجوم دا يعنى بيعزم عليكى بس بالافرنجى

جالت اه ه مش تجولو كده , كلت ام الشندويلى البسبوسة بسرعة جبل ما حلاميزو يرجع فى كلامه وهى تجول يا بوى طعمة جوى,

مفيش خمس دجايج وانفجرت ام الشندويلى فى الضحك الهيستيرى(التهييس)

ومن ورائها الدار كله يضحك عليها والعم دكشى معهم وهو يجول مالك يا ولية اتجنينتى ولا ايه
وهكذا كان بيقضى وجته بين المجالب وجلوسه على سجرة الجميز يجرا كتب عن العباجرة واختراعاتهم…

وفى يوم من أيام الصيف الحارة جاء للعم دكشى خطاب للحضور للمركزفلم يتأخر الرجل وذهب سريعاً حتى دخل حجرة

مأمور المركز ..فوجد عندة عمدة القرية ..الذى ما أن رأى العم دكشى

حتى قام مسلماً علية قائلاً لة : سلمات يا دكشى ياولدى ..كيف أحوالك..بجالى فترة مشفتكشى عندى فى الدوار؟

رد بعد أن سلم علية وعلى المأمور قائلاً :معلش يابا العمدة ..مشاغل …الحياة ومشاكلها اللى مابتنتهى

جلس العم دكشى والعمدة والمأمور الذى التفت للعمدة وهو يقول : أهو أحنا كنا لسة بنجيب فى سيرتة دلوقتى

ياعمدة..دكشى دة عامل ذى القط…مطرح ماتفتكرة وتجيب فى سيرتة بتلقية بينط قدامك طوالى

ضحك العمدة و دكشى ..الذى قال : بس جنابك أنتم اللى بعتولى أحضر ؟

رد المأمور : أينعم ..أنا عارف

أنتظر دكشى ولم يتكلم حتى يعرف ماذا وراء هذا الاستدعاء السريع

فلم يمهلة العمدة الذى قال لة : شوف يادكشى ياولدى….أحنا أمبارح بس جالنا أخطار مهم..علشانك

دكشى : أخطار؟..أخطار أية دة ؟؟.أنا مخلص جيش من زمان جوى

ضحك العمدة والمأمور الذى أكمل : لا..مش من التجنيد.. دكشى : يابوى امال من ويين؟؟؟

من مصر..من عند واحد اسمه غريب اسمه الاستاذ مجوشى ..و دة من طرف ام حلاميزو.الله يرحمها ويرحمنا جميعاُ…وبأختصار كدة..امه سابت مع الاستاذ ده دة..وصية ..الوصية دى بتقول أن الولد يتعلم فى مدارس كويسة ..وترك أسم مدرسة فى مصر…أو فى الارياف أو الصعيد..مانيش عارف المدرسة دى فين بالظبط..وكمان الجواب دة بيقول كمان أن امه كانت حاجزة مكان لابنها من يوم ميلادة..ودفع مصروفات أول سنة…وكمان

قاطعة العم دكشى قائلاً : أذاى الكلام دة؟..طب حضرتك مش عارف عنوان للمدرسة دى…أذاى بجى هنودية المدرسة دى كل يوم ونجيبة منها كل يوم..مش يجوز تكون فى أخر بلاد المسلمين؟؟

رد المأمور: طب سيبنى أكمل ..وأنت هتعرف كل حاجة…الجواب بيقول كمان أن المدرسة دى..داخلية..يعنى هيعيش فيها حلاميزو أبن أخوك…طول أيام الدراسة..وكمان الراجل بنفسة هو اللى هيجى يأخدة من هنا كمان شهرين…يعنى أول شهر تسعة بالافرنجى

هرش دكشى قائلاً : طبعاً أنا مش هجف فى طريج مستجبل ولد أخوى حلاميزو…أنا موافج ياسعادة المأمور

خرج دكشى هو يفكر قائلاً فى نفسة..دة كدة كمان أحسن..علشان حلاميزو يبعد شوية عن أم شندويلى اللى مش طيجاة ولا بلعاة أبداً…

يامانت كريم يارب
مرت الايام بسرعة..وجاء يوم خروج حلاميزو من تلك القرية التى عاش بها أول أيام وسنين عمرة القليلة…عرف حلاميزو من العم دكشى أبو لبدة ما هو مقبل علية من دراسة وحياة جديدة ..ولكنة لم يكن يعلم أنها حياة مختلفة كل الاختلاف عما عرفة وعاشة هنا فى قرية المرعوشية
أتت تلك السيارة السوداء هابطة من ذلك الطريق الترابى اللى مش مرصوف لتقف جنب دار العم الذى كان فى أنتظار القادم

هبط من تلك السيارة رجل فى منتصف العمر نحيف الجسد..طويل القامة..يلبس بدلة بيضاء على أحدث موضة ويمسك بيدة حقيبة سوداء تشبة لحد بعيد تلك الحقائب التى يحملها رجال الاعمال المهمين ..أسرع أبو لبدة من ذلك الرجل وهو يقول لة : ياهلاً وسهلاً بيك ياسعادة الا ستاذ فى دارنا وقريتنا كلها..أنت نورت المكان ياباشا

أبتسم الرجل وهو يمد يدة مسلماً على العم قائلاً : دة نورك أنت ونور أهل بيتك ياحج دكشى..أنا النهاردة أتشرفت بأخو .. أعظم شخصية عرفتها فى حياتى هو ومراته . .اللة يرحمك يا عوضيين بية..

رد دكشى قائلاً : اللة يرحمة …..اتفضل اتفضل ..البيت نور

رد مشكور قائلاً : علشان معطلكش..أنت أكيد عارف كل حاجة من الجواب اللى أنا بعتة

وأخرج من حقيبتة بأوراق كثيرة ..وقدم أحداها للعم قائلاً.: دى بقى موافقتك على دخول أبن أخوك حلاميزو للمدرسة الداخلية الجديدة

ياريت أمضاءك هنا….علشان أكمل أوراقى ونخلص موضوع المدرسة دى..وياريت يكون حلاميزو جاهز علشان هنمشى كمان نص ساعة من دلوقتى

رد دكشى : أدى أمضيتى..بس لية الاستعجال ياباشا..أنت لسة مشربتش حاجة ولا كلتلك لجمة معانا…لازم ولابد نجوم بالواجب ..دة أنت أول مرة تشرفنى هنا ..المكان نور واللهى

رد مشكور قائلاً : معلش ..فرصة تانية..الايام جاية كتير..أصل أحنا لازم نوصل لمحطة القطار بسرعة ..علشان دة القطر الوحيد اللى بيروح لحد مدرسة حلاميزو
هرش أبو لبدة قائلاً : طب أنا لحد دلوجيتى معرفتش مدرسة ولد أخوى فين بالظبط..علشان لما نحب نزورة أو حتى نشيعلة بجواب ..

رد الاستاذ مجوشى قائلاً : مكان المدرسة فى شمال سيناء…وكمان مش مسموح هناك بالزيارة
رد دكشى : أذاى الكلام دة..يعنى هنجعد سنة بحالها من غير مانطل على ولد أخوى.. أو حتى نعرف أخبارة أية…لا مش ممكن الكلام دة
أبتسم مجوشى قائلاً : لا ياحاج…أنت ممكن تبعتلة جوابات ذى ماتحب
رد دكشى : طب أذاى …هو فين العنوان بالظبط علشان الجوابات دى؟؟1!
رد بهدوءوغموض: مفيش عنوان…
قال دكشى فى دهشة : مش فاهم حاجة واصل..طب هكتب عالظرف من برأة أية ؟؟!!
ضحك مجوشى وهو يقف قائلاً : تعالى ورايا وأنا هسلمك البوستة كلها
مشى وهو مندهش ولا يفهم أى كلمة من تلك الالغاز الغريبة
خرج مجوشى ومعه أبو لبدة للشارع وفتح شنطة العربة البيضاء التى أتى بها وأخرج منها قفص صغير مثل أقفاص العصافير
ولكن ما كان بداخلة طائر أخر غير العصافير
هرش دكشى بقوة قائلاً : أية دة ياباشا

أبتسم مشكور وهو يقول مشيراً للقفص : دة البوسطجى اللى هياخد جواباتك من هنا وهيوردها لحلاميزو فى مدرستة هناك فى سيناء..وهو كمان اللى هيجيب ليك جوابات حلاميزو من هناك لحد هنا فى بيتك دة
ضحك دكشى فى أستعجاب قائلاً : بس دة لا هو بوسطجى ولا حتى حمام زاجل ذى بتاع زمان..دة..دة..دة بغبغان

ضحك مجوشى قائلاً : مانا عارف أن دة بغبغان ..بس هو متدرب على كدة ,فقال البغبغان لدكشى وهو يضحك بسخرية ها هاها اسمك دكشى هاهاهاها
قال دكشى يابووى دا بيتكلم زى الناس ايه التجدم اللي احنا فيه ده
وتسائل فى بلاهة ظاهرة : طب هيمسك الجواب أذاى يعنى. هايشيلو فى جيبه؟
رجع يضحك مجوشى قائلاً : لا..لا ياحاج دكشى..هنا بقى هتحط الجواب وتقفل عليها الحلقة دى وهو عارف المكان كويس
رد دكشى فى دهشة : دة أية التجدم دة..دة الواحد مش عايش فى الدنيا ياناس..بس أية لزمتة الطريجة الغريبة دى

رد مجوشى قائلاً : معلش أصل المدرسة دى ليها قوننها..أقصد نظامها الخاص..دى أكبر مدرسة لتعليم ضرب الودع والشعوذة..أحم..أحم.أقصد لتعليم الاولاد أحدث العلوم ..دى مش أى حد يقدر يخشها
علشان كدة طريقتها غريبة حبتين علينا هنا فى مصر

هز أبو لبدة رأسة علامة الفهم قائلاً : أيوة..أيوة..فهمت دلوجتى..يعنى المدرسة دى بتاعة الناس الاكابر ..بس

أبتسم مجوشى فى دهاء قائلاً : أيوة..هى بتاعة الناس الاكابر بس…

وبعد أن أنهى كلامة نظر لساعة يدة قائلاً : ياةة..أحنا أتأخرنا قوى..ممكن تجيب حلاميزو علشان نسافر..دة أحنا قدمنا مشوار طويل جداً

الى ان نكمل ,,
محمد مصطفى