بيان حاله .. تعديلات دستورية :)
السلام عليكم و رحمة الله و بركاته,
طبعاً في تهنئة واجبة لكل طالب في شباب الدفعة النهاردة و أكيد السبب معروف .. مبروك يا شباب الوصفية خلصت و الحمد لله .. ربنا يسترها معانا يا رب في الامتحان و التصحيح 
طبعاً الموضوع النهاردة المفروض انه كان ينشر في ميعاد سابق بس للوصفية .. قصدي للظروف احكام 
.. النهاردة الموضوع سهل و بسيط و هو بيان حالة للموقع اللي تم افتتاحة تقريباً من 10 ايام (مش 10 بالظبط يعني! ) … ما علينا .. المهم هو ده موضوعنا و عندي شوية كلام اتكلم عنه كده … ربنا يعينكم بقي و يصبركوا عليا
أولاً: اللي هتشوفوه دلوقتي هو نتاج قرار جنوني و متسرع و رهيب و اهوج و طائش … الخ من الحاجات الغريبة … طبعاً مش هقدر انزله في الموضوع مباشرة كده .. بس لو سعادتك دلوقتي في الـ index او الصفحة الرئيسية .. لازم تكمل قراية الموضوع الكبير اوي ده و الممل و المميت علشان تعرف ايه اللي جواه … فضلت انه ميعرضش كله كده في الصفحة الرئيسية .. يعني شوية تشويق كده … انا حاسس اني بتكلم كتير صح و لا أيه ؟ …
ببساطة ده كان أولاً .. و اللي مفهمش ايه المقصود .. فهو كالتالي … الموقع بعد 10 ايام و فجأة كده لقيت انه بسم الله ما شاء الله كويس و بيحصل علي معدل عالي و اهتمام و لله الحمد منكم و من ناس كتير .. و بسبب كده قررت اني انفصل بالمدونة (الموقع .. قريباً ) عن موقع مدونتي المتواضعة “اتكلّم” و عشان كده باذن الله تم حجز Domain (اسم نطاق) و هو www.f9arts.com علي فكرة الاسم ده انا بعتبره مميز لانه بيدل مباشرة علي فنون جميلة (حاليا اتحجز بس مش هننقل اليه و مش هيشتغل الا في الاجازة ان شاء الله) … و الله فكرة الواحد ممكن بعد سنه سنتين يبيعه كده علي بتاع 10,000$ .. بالتأكيد لا .. أكيد بهزر .. طبعا في منكم ممكن يسأل طيب و ايه علاقة الاسم المذكور بالاعلي بينا .. دا احنا حتي مش فاهمينه ؟!
في الحالة دي و بكل بساطة هحس انه هيجيلي احباط 
المغزي من كلمة F9 هي Fine زي ما في الـFast Conversations Shortcuts زي مثلا Great بنخليها Gr8 كده يعني .. و الله حاسس اني طفل و انا قاعد افهم كده .. زي ما يكون بقنع نفسي يا ريت تكون وصلت .. و أكيد في شكر لازم اوجهه لصديقي و رفيقي و أخويا الرائع “علي” علي دعمه و مساعدته المتواصله نفسي اعرف ايه ردود افعالكم ضروري للموضوع ده ؟
كده خلصنا من أول بند , لا لا لا لسه المشوار طويل .. لو تعبت فوت بكرة و كمل
ثانيا: شوية حاجات عن الموقع كده !
الموقع بسم الله ما شاء الله و هي ديه الحاجة المشجعة انه في غضون 10 أيام عمل و لله الحمد 3,000 زيارة تقريباً .. بالظبط يعني لحد ما انا بكتب السطر ده 3,015 و بمتوسط تقريباً 250 زيارة في اليوم و ديه نسبة عالية و مشجعة ان الموقع هتزداد زياراته في خلال اقل من شهر كمان بالاضافة الي نسبة عالي من التفاعل و هي في 5 مواضيع فيه 103 تعليق .. حاجة تفرح و الله و ده حافز مشجع ان الموقع هتكون فيه تغييرات مستقبلية للافضل خلينا نتكلم عنها في وقت تاني..
ثالثا: اضافات لدستور الموقع
تعديل بالمادة 3
تعديلات دستورية كثيرة هتحصل و منها تعديل المادة 3 و ذلك لوجود ثغرة خطيرة اكتشفت في الايام الماضية و قد استغلها بعد الخارجون علي القانون العام امثال المدعوة Mira , Rony و امثالهم و تتمثل هذه الثغرة في النص الاتي:
“علي السادة المدونون الالتزام بخيار من اثنين…”
و لم يتم ذكر المعلقون علي المواضيع بخصوص موضوع الارابيش Arabish .. و هنا تعديل المادة الي الأتي:
“علي السادة المدونون و المعلقين الالتزام بخيار من اثنين: استخدام اللغة العربية قراءة و كتابة و لا يشترط ان تكون الفصحي , او استخدام اللغة الانجليزية قراءة و كتابة . و يمتنع استخدام لغة الـ Arabish ”
و من يخالف ذلك سوف تتخد الاجراءات القانونية ضده وتتمثل في حذف التعليق نهائياً ! … معلش يا جماعة بتجيلي حمي من الارابيش…
رابعاً: عرفنا بنفسك بعد اذنك !
و النبي يا جماعة كده بسرعة يعني في ناس بتكتب تعليقات و بتدوخنا وراها السبع دوخات .. نضرب اخماس في اسداس ( المنشور السداسي كان يعععع في الامتحان ) و نخمن هو مين و اسمه ايه .. يا ريت بس لو يتكرم من نفسه كده يعني اللي شايف ان الاسم بتاعه غريب شوية انه يكتب تحت كده اسمه و يعرفنا بنفسه مرة واحدة مش في كل الموضوعات يعني طبعاً !
خامساً : اقتراحاتكم لقسم “الورشة”
اقتراحات يا جماعة اقتراحات !
عايزين اقتراحتكم و تصوركم لقسم الورشة .. نفسكم يكون عبارة عن ايه و شكله ايه و مضمونه ايه .. حالياً .. في شبة اتفاق انه هيكون Gallery نحط فيه احداثنا و احداث الكلية بصفة عامة .. مش عارف .. اقتراحاتكم مطلوبة بعد اذنكم
انا كده تعبت من الكتابة و الله ..و حاسس ان مفيش حد قدر يوصل للسطر ده اساسا !
المهم اختصارا للموضوع في نقط سريعة كده :
- و الله يا جماعة في قسمين اسمهم “كتب و مصادر” و “مواقع و روابط” المفروض انهم ليكوا بتضيفوا فيهم اي مواد مهمة و مواقع مهمة … طبعاً السنة خلصت فهما دلوقتي ملهومش لازمة تقريباً الا للي غاوي بقي 
… يعني مجرد تنويه للمستقبل
- لو في اي اخطاء في الموقع او اي حاجة غريبة او غلط او شايفينها مش حلوة يا ريت بس تقولولنا علشان تتظبط .. مثلاً كان في مشكلة لتصميم الموقع مع resolution 1024*768 و اللي تم اكتشافه بالصدفة
- تكرار لنفس النداء : يا جماعة لو حد لقي اي معلومات عن الكلية يقولنا عليها و نضيفها لصفحة الكلية لانها المفروض تكون صفحة مهمة .. مش كده ولا ايه ؟!
- المدونة ليست مجرد حلاميزو !.. فهو في جميع الاحوال اكثر الناس النشيطة و لكنه ليس كل الناس .. عندنا كام مدون كده في حالة تشبة البيات الشتوي كده و هيصحوا علي الاجازة
حاجات سريعة للمدونين :
عشان التنسيق يا اخواننا - بلاش الcharacters flooding زي مثلا : ” اهلااااااااااااااااااااااااااا, شكراااااااااااااااااااا, جمييييييييييييييييييييل ” بلاش الحاجات ديه افضل شكلها مش حلو و مش معبر و اخص برضة المعلقين عن المواضيع .. فظاع في الحركة ديه
انا انتهيت كده .. انا و الموضوع .. تعبت .. يا رب اشوف تفاعلكم في الحاجات المذكورة بالسلب او الايجاب مش مهم .. الاهم انه التفاعل ده هو التطور للموقع نفسه ! شكراً ليكم و لصبركم عليها و الملل اللي سببته ليكم شدوا حيلكم في الانشاء … خير باذن الله
الموقع ادناه,
محمد عبد الشكور عرب
Eye’rule
في مايو 29th, 2007 at 12:49 ص
مع السلام عليكوا
اولا
بحب ابارك للسيد الرئيس محمد عرب على التعديلات الدستورية الجديدةويارب نعيش معامك فى امان و استقرار
ثانيا
( المنشور السداسي كان يعععع في الامتحان) ايه اللي انتا بتقوله دا اش حال ان انا قايلهلك الصبح هو اه عملناها غلط بس مش مشكلة
ثالثا
!.. فهو في جميع الاحوال اكثر الناس النشيطة :$
بس ماتنكرش ان حلاميزو عامل شغل عالى
بس خلاص…….
في مايو 29th, 2007 at 1:05 ص
اولا مبروك علينا انتهاء الوصفية وربنا يعديها على خير وثانيا مبروك على القرار الجنونى الرهيب الطائش :)مبروك لينا كلنا وبجد حاجة تفرح عدد الزيارات والتعليقات ماشاءالله وانشاءالله تزيد كمان و كمان ولوفكرت تبيع الموقع ماتنساش اخواتك لينا نسبة برضة ;)وبالنسبة لموضوع ال arabish انت لحقت نفسك بتعديل المادة 3 عشان بكل صراحه كانت احدى خططى انتشار الarabish فى الموقع عشان انا بعانى من الكتابة بالعربى بس هاضطر استخدم خطة بديلة وهى انتشار الانجليشية الحديثة وابقى اعترض بقى يا شيكو p: وبالنسبة لقسم الورشة انا من المؤيدين للاقتراح (وصلت للسطر دة)وانشاءالله البيات الشتوى يخلص ونبدا فى التدوين بس يارب الامتحانات تخلص على خير وربنا يوفقنا كلنا ..
في مايو 29th, 2007 at 6:30 ص
السلام عليكم
أنا اول لما فتحت النهارده كنت متأكده أني هلائي تعديل دستوري ..”لحقت نفسك”.بس مش مهم يعني أنت عارف (تبعاً)(:طبعاً احنا ثقافتنا عاليا موت و جامدين قوي و بنعرف نكتب عربي عربي و انجليزي انجليزي و كل اللغات (ماتنكرش) بس باردو أنا ماخاليفتيش الدستور بس أنت واضحت الماده الآن و باردو لو عايزني اتكلم بالفحصي هتكلم يعني عادي احنا مانقدرش نرفضلك طلب(:
و علي فكره أنا قرات (حلوه قرات)الموضوع لآخره و عجبتني فكرة (f9arts)بس هيا هاتيتقرأ (فناين اَرتس)b:(:
علي أي حال مبروك و سلاموا عليكم
المدعوهMira
في مايو 29th, 2007 at 11:15 ص
Mr. president Mohamed AbdelShakour Arab, we should thank you for all your efforts in order to make this site the best of the best of the few good sites arround the world. To be honest i couldn’t read all this :D:D but i will read it in any other time. And about the Amendment No. 3 article in the Constitution i would like you to reconsider it again. please let it be Arabish just till we finish the exams and then you can turn things back. THIS IS OUR HUMAN RIGHT. please help. thanks. And about information for the college i can help you as soon as i can.
في مايو 29th, 2007 at 11:22 ص
i’m sorry for writing again but how am i gonna contact you to give you the infrormation i have about the college?! please send me back
في مايو 29th, 2007 at 12:21 م
mohamed mostafa : “بس ماتنكرش ان حلاميزو عامل شغل عالى ..”
ثانيا: حوار الانجليشية, مفيش مشاكل .. براحتكم في الحوار ده .. لان مفيش حد و الحمد لله يعرفه غيرك 
اعمل ايه و الله هي كده مجازا بتتقري فاين ارتس 
- اضغط عل نفسك شوية .. المذاكرة مش مقطعة بعضها يعني .. ثانيا لو بتذاكر ايه اللي يدخلك هنا تقرا اساساً 
شكرا علي التعليقات و التفاعل و خير ان شاء الله 
محمد
ايه يا عم انتا هتعيش بقي ولا ايه .. اش حال اني مفتكسلك الاسم و هاظبطك بعد كده
تم تعديل التعليق عشان حلاميزو زعلان .. يا عم الناس مسيرها هاتعرف ايه الجديد قريب .. صور و كلام و افيشات لحلاميزو و حملات دعائية .. ما انتا عارف و شايف
“انا قايلهلك الصبح هو اه عملناها غلط بس مش مشكلة…” يا عم و النبي خليك في حالك .. علي كل الأحوال احنا عملنا اخر حته بس اللي غلط مش كلها
nariman : “ولوفكرت تبيع الموقع ماتنساش اخواتك لينا نسبة برضة ..” … لا ماعتقدش .. اصلي بحب خصوصية في الحاجات دي .. ممكن يعلي مثلاً عن عشرة
mira : اولي ضحايا الاسم ! ..
Mohamed Yasser : علي فكرة بالمنظر ده انا هاتقفش
بالنسبة لموضوع الكلية و المعلومات فحضرتك انا عارف ان مفيش وسيلة للتواصل و قررت اني معملش صفحة اسمها “اتصل بنا” اصل احنا مش في شركة
خلاص مفيش غير وسيلة واحدة و هي الMSN Messenger
:) تمام كده ؟طبعا سعادتك فاهم عشان الـSpam انا عامل كده .. انتا بس هتغير # و استبدلها بـ @ ( بيخش msn messenger عادي
في مايو 29th, 2007 at 9:42 م
السلام عليكم
اولا الحمد لله اننا خلصنا الوصفيه على خير ويارب عقبال باقى الامتحانات ثانيا مبروك على التعديلا ت الدستوريه انا الحمد لله قراتها كلها وبجد كلها قرارات جامده موت وانا مبسوطه اوى من التطوير المستمر للموقع وعددالزائرين الى فى تزايد وان شاء الله احنا فى الاجازه اكيد كلنا هنحاول نطوره والعدد هيزيد اكتر ان شاء الله وبجد عبد الشكور عامل مجهود جامد اوى يلا بقى كفايه كده علشان الانشاء اصل المذاكره مقطعه نفسها يلا باى
في مايو 29th, 2007 at 9:49 م
هاى….
ممكن يا سيادة الريس تفكر بجد فى البند 3 لأنه متعب شوية وفى مصلحة الشعب ده أولا
ثانيا ممكن نخلى الورشة نعرض فيها اللى بنأخده فالكلية زى مشاريع الديزين والتشكيل ولو فى أى حاجة ممكن تنفعنا فى السنين اللى جاية وممكن نحتجها
ثالثا ميرسى أوى على حكاية السيت الجديد وأهتمامك بينا
باى
في مايو 29th, 2007 at 10:42 م
السلام عليكم ورحمة الله وبركاتة
جزاك الله خيرا
على هذا المجهود الرائع
ونتمنى جميعا ان تكون دائما
بهذا التميز ان شاء الله
البند الاول:
بالتاكيد انا سعيدة بحجر domain
فهذا تقدم رائع
وانا معجبة بالاسم جدا
ما شاء الله
http://www.f9arts.com
البند الثانى:
ادهشنى هذا الرقم
ياه ما شاء الله
فهذا خبر يدل على اهتمام رائع
والحمد لله
البند الثالث:
انا اؤيد هذة المادة وبشدة
لاهميتها فى المستقبل
وانها لمصلحة الشعب
ردا على (menna.e)
فتمسك به
البند الرابع:
معك حق
البند الخامس والاخير:
الاقتراحات قد تناولتها معك سابقا
وبالتوفيق دائما
والسلام عليكم ورحمة الله وبركاتة
في مايو 30th, 2007 at 5:47 م
السلام عليكم
ايه القاونين و التعديلات الجامده دي
لعلمك يا باشمهندس شيكو قانون العربي عربي بجد رغم انه صعب على ناس كتيره بس بجد نكته الي بيكتبوا عربي غلطات غير طبيعية و الي بيكتب انجليش 80% مش هيقروا تعليقوا :]
بس اجمد ما في الموضوع ان سياتك بقيت رئيس جمهورية اعدادي عمارة (مش عارفة اقول سابقا و لسه بدري بس إن شاء الله يعني;))
المهم ربنا معانا كلنا و ندخل سنة اولى على خير (و دعوة خصوصي للبنات …نفضل بنات:S )
و ادعولنا في الانشاء علشان انا نسيييت السلم :$
و سلام
في يونيو 3rd, 2007 at 12:39 ص
السلام عليكوووووووا عاملين ايه ؟؟؟؟اولا: انا معاك فعلا فى ان الحمد الله انا الوصفية خلصت بس المهم ان النتيجة تبقى كويسة وان الدكتور يصحح كويس ويكرمنا علشان ربنا يكرمه
ثانيا: والتعديلات حلوةجدا واحنا مستنين
http://www.f9arts.com
وثالثا والاهم: انا نفسى جدا نخلص والنتجة تطلع كويسة ومحدش يشيل السنة من الدفعة كلها علشان على الاقل نبقى دفعة مميزة
والسلاااااااام عليكم
في يونيو 3rd, 2007 at 1:41 ص
heba adel : ان شاء الله كلنا نساعد في تطويره للافضل ان شاء الله
مش هيتغير 
menna.e : شكراً علي اقتراح الورشة.. بالنسبة للبند 3 لا لا لا
Yasmin Mounir && Nora && heba atef : خير ان شاء الله و شكراً لدعمكم و ان شاء الله الننتيجة تبقي كويسة و كل ما يشيل
شكراً علي مساندتكم للموقع و ان شاء الله في مع الانتقال للدومين الجديد هيكون في شكل و قابلية جديدة للاستخدام .. هتعرفوها في ساعتها بعد اما ناخد الاجازة علي طول كده