بسم الله الرحمن الرحيم
بسم الله الرحمن الرحيم,,
و الصلاة و السلام علي اشرف الانبياء و المرسلين…
اما بعد,,
في هذه اللحظة نعلن عن بدء انطلاقة موقع (مدونة) شباب و بنات كلية الفنون الجميلة بالزمالك- القاهرة 
!
و ذلك تحت اسم “The FineArts Blog” و Slogan (الـعنوان الفرعي) : “Just Another FineArts Geeks !” , طبعاً كلكم فاهمين الكلام ده يعني ايه 
طبعا احنا داخلين علي بداية الموقع ده و بقلب جامد اوي علشان معانا و ورانا ناس جامدة جداً و علي سبيل المثال لا الحصر الشاب الحكيم : حلاميزو (ابسط يا عم أسمك في اول بوست كمان;))
المهم,, (كلمة محورية جداً:D)
علشان الكل يكون راسي كده وواعي احنا دلوقتي هنسطر اولي مواد دستور المدونة ديه دلوقتي..
المادة 1
المكان ده ايا كان اسمه فهو لا يمت بصلة او بصفة الي جروبات الياهو, علشان محدش يفتكر انه هنا هيقضيها رسايل المجموعات البريدية و كلمني شكرا و لو مبعتش الرسالة ديه خلال 5 دقايق و انا حلفتك بالنبي , انتا نفسك و جهازك هتولعوا لانك مبعتش الرسالة !
ديه مدونة و معني الكلام ده ان كل واحد بيكتب بنفسه اللي هو عايزة , كلام من داخله مش منقول علشان نرد عليه و نقول “مشكووووووور” , يعني ببساطة اكتر , ديه مدونة مش منتدي من منتديات الورود و الأزهار
المكان ده ممكن في يوم من الأيام , او هو بالفعل دلوقتي كده, واجهة رسمية لمجموعة من شباب كلية فنون جميلة الزمالك 
المادة 2
علي السيد المحترم ماسيه الدفعة الاهتمام بنقل كافة و اهم الاخبار و التطويرات في هذا المكان لانه سوف يكون وجهة مباشرة لناس كتييييير من الدفعة, و مع وافر الاحترام تقبلوا هذا الكلام يا معالي الماسيه (اي نعم السنة خلصت , بس للسنين اللي جاية )
المادة 3
علي السادة المدونون الالتزام بخيار من اثنين: استخدام اللغة العربية قراءة و كتابة و لا يشترط ان تكون الفصحي , او استخدام اللغة الانجليزية قراءة و كتابة .
و يمتنع استخدام لغة الـ Arabish (ماشي يا Nermo ? )
المادة 4
هذه المدونة حرة لا حدود فيها الا خط احمر و هو السياسة…ابتعدوا عن السياسة يا شباب .. احنا لسه بنقول يا هادي:)
اخيراً
- علي جميع الزوار ابداء الرأي بالتصميم و حرية النقد فهو مقبول
- هناك مازال مجموعة من الأقسام تحت الانشاء (يعني عايزين حد يكتب تاريخ الكلية كاملاً و بالصور الشمسية الحديثة لوضعة في قسم عن الكلية) .. حلوة شمسية ديه
- بالنسبة لقسم “من نحن” فهو بحاجة الي اجتماع الجهات المعنية لوضع الوثيقة الرسمية للتعريف عن انفسنا
- قسم “الورشة” لم يتم الاستقرار علي تحديد هويته فاما ان يكون ساحة حوار مبسطة او معرض لابداعات الاعضاء و جاليري لاحداث الكلية و المعارض ..
شكرا.. نشكركم جزيل الشكر .. و نرجو التفاهم في الوقت الحالي مع اي مشاكل و ابلاغ الجهات المعنية بتطوير الموقع , و التفاهم مع بعض الاقسام التي مازالت قيد التطوير .,,
تحياتي,,
الموقع ادناه و اللي عاني مع الموقع ده
er : Eye’rule
في مايو 15th, 2007 at 11:59 م
مع السلام عليكوا
مبروك علينااااااا الموقع بقى جامد اخر حاجة
مع السلام عليكوا
في مايو 16th, 2007 at 12:14 ص
أهلين فيكن يا جماعه و اتمنى ان يكون موقع جامد ان شاء الله
يالا يا شيكو حبه عربى
في مايو 16th, 2007 at 12:30 ص
السلام عليكم ورحمة الله وبركاتة
اولا احب اقول “مبروووووووووووك يا دفعة”
على هذة المدونة
التى سوف تكون ان شاء الله رائعة بجهودنا
بجد سعيدة
ولى تعليق على المادة 3
بجد مادة رائعة عجبانى جدااااااااااا
فانا ادعم تلك المادة وبشدة
(عربى عربى- انجليزى انجليزى)
فللاسف نحن الان نواجة مشاكل فى كتابة العربى (الاملاء)
واللغة الاجليزية (فى الترجمة)
ونظرتى العامة للمواد
هى جيدة جدااااااااااااااااااااا
يا عبد الشكور وهى مرتبة
ما شاء الله
وتصميم المدونة بجد ممتاز
ما شاء الله
واتمنى ان اكون فعالة فى هذة المدونة
ان شاء الله
ولو فى اى مساعدة استطيع القيام بها
فانا فى الخدمة
عمل رائع
والسلام عليكم
في مايو 16th, 2007 at 12:30 ص
السلام عليكم
مبروووووووك الموقع و انشاء الله هيكون موقع جامد مووت.
و السلام عليكم
في مايو 16th, 2007 at 12:50 ص
مبرووووووووووووووووووووووووووك ….بجد مبسوطة جدا و ان شاء الله يكون موقع (جامد اخر حاجة مع بشمهندس حلاميزوو)و بجد ربنا يخليك لينا يا شيكو وكتبت عربى عشان مااخالفش الدستور بتاعنا ولو عايزنا نكتب بالفصحى احنا ناس مثقفة ماتقلقش
في مايو 16th, 2007 at 1:04 ص
m.mostafa , ousi , ياسمين منير, kareem , nariman :
مش هتكلم اكتر من كده و اهم حاجة ان التصميم عجبكم 
مبروك علينا جميعا , و ان شاء الله كده ييجي منها حاجة حلوة
في مايو 16th, 2007 at 11:10 ص
السلام عليكم
بجد انا مبسوطة موووت المدونة حلوة كده و احلى حاجة فيها انها لمتنا كلنا
بس يا استاذ عبد الشكور انا بنام الساعة 10 او 11 بالكتير انتوا بقى افتتحتوا الموقع امتى!!!
ما علينا القوانين جامدة و طبعا اصعبها بتاعة العربي عربي دي علشان لو حد من اصحابي هيكتب يعني انا الي هدبس في الكتابة بس طبعا بما ان ياسمين عرضت المساعده فهي الي هتكتب لنا كلنا ان شاء الله( انا هبقى اخترع اختصارات في العربي علشان كده صعب)
و بلاش حكاية مثقفة دي يا نيرمو علشان خلي الطابق مستوووووور:)
و سلامات
في مايو 16th, 2007 at 11:31 ص
السلام عليكم
اول حاجه مبروك عليك الموقع يا شيكو باشا والمواد انا قريتها وحسب مفهوميتي فهمتها بالشبه
المهم مبروك عليك بجد وعلينا كلنا الواحد يبعد عن الموضيع الكبيره بتاعت حضرتك ويخليه في كليته
مع السلاموا عليكوا
في مايو 16th, 2007 at 1:43 م
السلاموا عليكم
وهاي أصحابي مبرووووووك اوي يا شيكو علي الموقع داه فكرته جامده و عجباني و نفسي أشوف (يوميات حلاميزو)و لازم تبعا يكون فيه (واهدانيات) كل فنون جميله محضرا حاجات جمدا مش أي كلام يعني:)و أنا مبسوته أوي و بس خلاص……….
في مايو 16th, 2007 at 3:29 م
السلام عليكم يا شباب , بيعجبنى فيكم ابتكارتكم بس المرة دى حاجة تحفة……واقولكم مبرووووووك,وانا بجد فخورة اوى ان انا فى الكلية دى, ومع شباب وبنات زيكم بتعرف تفكر بالطريقة الحلوة دى, ولو عايزين اى مساعدة انا فى الخدمة بس ده لو عرفت اصلا اخدم بس جربوا لعل وعسى….واحلى حاجة فى المواد: المادة4 (الابتعاد عن الساسية ) علشان احنا اصلا ملناش فى السياسة , وابسط يا كريم باشا فى مادة عليك انت بس…يلا سلااااام كفاية اوى كده…
في مايو 16th, 2007 at 5:33 م
السلام عليكم
الف مبروك ياجماعه انا برده بجد مبسوطه موت بافتتاح الموقع بتاعنا ويارب كلنا نحاول دايما نطوره وانا فخوره اوى بكليتنا وببنات وشباب كليتنا على افكارهم الجامده دى اما الماده التالته والرابعه دول اجمد مادتين ويلا سلااااااااااااام
في مايو 16th, 2007 at 5:38 م
مشكووووووووووور يا عبد الشكور…ايه الحاجات الجامدة دى بس!!!يا عم احنا لا لينا فى السياسه ولا البطيخ….وكلنا معاك يا عبد الشكور ونعلى موقعنا الجديد ومبروك يا كريييييييييييييم عقبالنا…
في مايو 16th, 2007 at 9:36 م
الف مبروك لينا كلنا…و برافو يا عبد الشكور انك قدرت تعملنا حاجه جامده كدا و هو دا عشمنا..المواد جامده بس ربنا يقدرنا على موضوع (عربي-عربي):)و اخيرا مشكوووووووووور يا عبد الشكور
في مايو 17th, 2007 at 7:09 م
السلام عليكم ورحمة الله وبركاته
مبروك دى فكره جميلة جداوبالذات فكرة العربى-عربى ده بالنسبة للمادة3 اما المادة4 فطالما بدأت ب (مدونة حرة……..وخلصت ب الا ) فخير برضوا ان شاء الله وبرضوا مبروووك لينا كلنا
سلام عليكم
في مايو 18th, 2007 at 11:14 م
هاااي يا شباب
ويارب دايما تجبولنا افكار جامدة كدة
بجد فكرة جامدة اخر حاجة يا جماعة ومبرووووووووك الموقع بجد حلو اوي
بس مش مادة 3 صعبة شوية ( مش شويه بس )
انا بقالي ساعة بكتب في المسدج ديه :’)
يلا اهم حاجه ان محمد يبقس مبسوط:D
وبجد حلوة اوي الفكرة دية
في مايو 19th, 2007 at 1:00 ص
ألف مبروك يا شباب علي حلاميزوو و ربنا معاكو إنشاءالله. أنا بس ليا نقد صغير جداً علي المادة 3 في الدستور و أتمني من السادة المسئولين أن يراعوا خرفان الكتابة بالعربي أمثالي و يا ريت يحاولوا يدخلوا ثقافة الأرابيش و بالتالي القيام بتعديل الدستور.
أما بالنسبة للسيد حلاميزووو فهو جامد آخر حاجة و يا رب يفضل جامد علي طوول.
أخيراً خلصت….أنا كدة هاشيل حقوق إنسان بسبب المادة3 و تضييع الوقت دة.
في مايو 20th, 2007 at 11:00 م
NO COMMENT
في مايو 23rd, 2007 at 3:09 ص
wow . the blog is nice .
saying the truth i didn`t like it at first but now i think it is a good idea to gather the dof3a on it to share opinions . wating for the new news on it isa. thanking all who shared to make this blog . bye
في مايو 24th, 2007 at 3:31 ص
السلام عليكم و رحمة االله و بركاته
الف مبرووك يا جماعه الموقع هايل بجد و انا فرحانه بيه اوى و تقريبا قولت لكل اصحابى عليه و سعييده جدا جدا انى فى الكليه ده بجد و بحبها اوى و فخوره بيها و بيكو اوى اما بالنسبه المواد فبرضو اصعب ماده فيها الماده 3 بس حاضر يا فندم و مبرووك يا كريم .
في مايو 26th, 2007 at 11:48 م
Nora, morsy, mira, هبة عاطف, هبه عادل, monamonto, beny, أماندا علوانى, mo0r0o, Mohamed Yasser, rony, hadoola, yasmeen :
بجد شكراً للكل عل الدعم و ان شاء الله كده في بداية الاجازة او قبل بداية الاجازة كمان .. هاتسمعوا اخبار كويسة باذن الله او زي ما بيقولوا كده بالانجليزي : this site rocks! 
بالتوفيق للجميع في الوصفية 
و فجأة كده افتكرت ان فيه موضوع نسيت ارد علي تعليقاته !