دقوا الشماسي :)
….بدأنا الصيف بحره و الاجازة الطويلة العريضة الي بتخلص بسرعة معرفش ازاي؟!
بس كل ده مش مشكلة , المشكلة في مفاجأة كل سنة معرفش بقول عليها مفاجأة ليه رغم إن كلنا بنبقى متوقعنها :S
بس يمكن بقول عليها كده علشان كل سنة بقول انها مش ممكن تحصل 
بس واضح إنها أمر واقع (حيث لا حل)
المشكلة كلنا عارفنها بس الحوار هي ليه بتحصل و ليه ملهاش حل … كل صيف لازم و لابد الميه و الكهرباء يقطعوا
الميه… يقولك اصل المواسير ضعيفة و لازم نغيرها و مش عارف ايه..و كل سنة يغيروا المواسير و يقولك دي الماسورة (السوبر) الي مش ممكن دي بقى بتاعة العمر كله و للأجيال الجاية كمان … ده احنا حتى مش عاملين مواسير احتياطي اصل دي مفيش منها اتنين … و والله كل سنة بصدق و مفيش كام يوووم و تلاقى الماسورة الام ضربت
المهم ان بلدنا فيها النيل يعني عندنا ميه و بغزارة يعني يا ما شاء الله … و بلاد تانية عايشين على المياه الجوفية و بسم الله ما شاء الله عمرنا ما سمعنا إن حد عاش فيها و اشتكى من الميه
المهم إني فهمت بعد العمر ده كله إنهم بيعملوا كده فينا علشان مصلحتنا ;) ما هو اصل الحكومة بتخاف علينا ما احنا الرعايا الي برده مفيش مننا اتنين … اصل الميه ملوثة و مليانة اوبئة و أمراض علشان كده هم بيقطعوها عننا كده كل فترة علشان صحتنا اصل برده الواحد ملووش في الدنيا دي غير صحته (محدش واخد منها حاجة)
اما الكهرباء بقى دي فيلم لوحدها….يقولك اصل الكابل اتحرق و مش عارفة محطة توليد الكهرباء الموظفين مضايقين و لا مش عارفة ايه … و لما الكهرباء تقطع تكلم المصلحة يقولك بإذن واحدٍ أحد خمس دقايق و جاية و متقلقش خالص ده عطل بسيط
(و فعلا بيكون بسيط لدرجة إن الكهرباء بتكون مقطوعة عن الشار ع كله) بس برده بسيط بالنسبة للميه الي بتقطع عن مدينة بحالها :]
المهم إني سمعت إن بلدنا بتصدر كهرباء لبعض الدول الشقيقة بس سؤال يطرح نفسه … لما في بلدنا بيحصل كده امال في الي بنصدرلهم الكهرباء بيحصل ايه؟؟
بس عادي … الي سمعت عنه برده في اليابان البلد الشقيق حسسني إن إحنا في نعمة :)… هناك لما تكون الكهرباء هتقطع قبلها بشهر بيبلغوا سكان المنطقة انها هتقطع من الساعة كذا لكذا و الفترة بتكون ثواني تتعد على الكف مفيش غير الحمد لله …احنا في نعمة بلاد كتير بتفتقدها
يعني كام بلد لما الميه بتقطع عندهم اسبوع متواصل بيبلغهوهم في نشرات الاخبار اطمنوا و اعملوا حسابكوا انها هتقطع اسبوع كمان لتبقى المدة الاجمالية اسبوعين لنكسر الرقم القياسي :]… برده نعمة كان ممكن يسبونا نكتشف الموضوع بنفسنا :S
و كام بلد بتبقى عارفه إن كل سنة الكهرباء هتقطع في شهر يونيو ( وقت امتحانات الثانوية العامة بالضبط) لا و ايه في وقت المذاكرة كمان والله بلد متقدم عارفين مواعيدنا :$
عمتاً مش مشكلة احنا اتعودنا خلاص و بجد (حيث لا حل)
أو الحل إن احنا نسافر نصيف و الي مش هيصيف يبقى مايدقش الشماسي .. يروح يعبي ازايز و يشحن الكشافات و ربنا معاه بقى و يهديه للطريق الصحيح (المصيف)
في الأخير احب اوجه إن الكلام ده كان عن بلاد الواق واق بعيداً عن نطاق مصر خالص و إن الموضوع ده من القصص الخيالية طبعا 
نورهان حسن
في يونيو 11th, 2007 at 12:54 م
مع السلام عليكوا
الماسورة (السوبر) ايه يا نور ده انت كنتى شغالة فى مقلة ولا ايه
بس و الله موضوع مهم وله صداه فى المجتمع( حلوة صداه دى)
وكفاية كدة عليكى النهاردة
في يونيو 11th, 2007 at 4:16 م
شكرا يا حلمي
و بعدين ايه مقلة دي ..انا ذنبي ايه هما بيقولوا كده :$
المهم انه عجبك و شكرا على الاهتمام
سلام
في يونيو 11th, 2007 at 4:53 م
مبروك يا نور على اول موضوع وهو بجد مهم و حقيقى (حيث لا حل ) و الواضح ان السنة دى قرار التعذيب جه بدرى شوية والمياه انقطعت من اول الصيف وكلنا كنا بنعانى منها وقت الامتحانات بس الحمد لله الامتحانات خلصت و بفكر ادق الشماسى احسن من تعبئة الازايز و شحن الكشافات وبالنسبة لموضوع الكهرباء فا ده انا مش هعلق عليه خالص عشان شعب الواق واق كلة بيعانى من انقطاع الكهرباء على مدار السنة كلها ودة بقى بجد (حيث لا حل ) مينفعش فية دق شماسى s: على العموم الموضوع بجد حلو و مهم و ربنا يوفقك دايما …(سلام و قبله
)
في يونيو 11th, 2007 at 4:59 م
الله يبارك فيكي يا حبي
يا بنتي المهم إن احنا بعيد كل البعد عن الواق واق دي
و ملناش اي علاقة بيها و الميه عندنا زي الفل هي و الكهرباء
انا بس كنت كاتبه الموضوع علشان الدولة عندنا تبعتلهم إعانات
و شكرا تاني يا قلبي
سلام
في يونيو 11th, 2007 at 5:12 م
ايه يا نورا الكلام الجامد دة حيتقبض عليكي يا بنتي ما هو احنا المصريين كدة اللي يقول كلمة الحق على امن الدولة على طول بس بجد يا جماعة البلد دي محتاجة كتير عشان تتصلح و الحكومة عايزة الشعب يبقى تعبان و فقير عشان زي ما الزعيم ما قال “الشعب يجب ان يكون فقيرا.. الفقراء يدخلون الجنة” ربنا معانا بقى بس اكيد حيبقى في تغيير……
في يونيو 11th, 2007 at 5:16 م
شكرا يا نور
بجد ايه الكلام الجد ده ماكنتش عارفة كده
بس عندك حق احنا ملناش في الدنيا دي احنا نعيش فقراء احسن علشان ندخل الجنة
و شكرا بجد على التعليق الجميل ده
في يونيو 11th, 2007 at 6:31 م
مبروك يا نورا على الموضوع الجامد ده بصراحة بداية موفقة ويا رب تكتبى دايما
المهم أنها دى بلدنا وملناش غيرها وأن مكناش أحنا اللى هنصلحها مين يعنى ألخ ألخ …..
وما علينا من كل اللى قلتيه لأنها كلها مشاكل فرعية أحمدى ربنا أنك لاقية تكلى وتلبسى لأن غيرك مش لاقى وأدعى للحكومة وأنتى بتصلى كل يوم أن ربنا يبارك لنا فيهم ويخليهم لنا كمان وكمان أحنا وولادنا
وبصراحة اللى مش عجباه البلد دى يا يغيرها يأما يهج منها ويريحنا وبطلوا الحقد والسواد اللى جواكوا .. أنتوا هتفضلوا طول عمركوا مش عجبكم حاجة
مع السلاموا عليييكم ….
في يونيو 11th, 2007 at 8:19 م
اولا شكرا يا بنتي و الله يبارك فيكي
بس ايه يا بنتي الحمية الخطيرة دي و اللي مش عجباه البلد و اللي مش عارفه ايه
الموضوع ده كانت حاجه غايظاني و كنت بشاركم فيها
بس احب انا الناس الي بتدي من قلبها كده و تدخل شمال
و مش هقول امين على إن الحكومة تفضل لاولادنا انا مستحملة لكن مضمنش ولادي يستحملوا
و سلام
في يونيو 11th, 2007 at 9:25 م
بجد الموضوع ده تحفه و الصراحه انتى دوستى عالوجع يا نور
عشان انا مش هنسى يوم الامتحان اللى المياه قطعت فيه و طبعا قضيت يوم عسلللللل………(طبعا كنت ساعتها قاعده فى بلاد الواق واق)عشان مفيش حد يفهمنى غلط
بس فى مشكله صغيره كده يا نور انا احتمال نسافرش السنه دى:$
؟؟؟؟؟؟؟؟؟؟!!!!!!!!!!!!!!!!!!!!!!!!!!!1
في يونيو 11th, 2007 at 9:35 م
ماقولنا يا ايمان الي مش هيسافر يعمل حسابوا في براميل الميه و الكشافات
بس عمتا كلنا دقنا مرار الميه الي قطعت في الامتحان و رحنا و احنا متعكنين
بس عدت خلاص و ربنا يصبرنا على ما ابتلانا
و شكرا و سلام
في يونيو 11th, 2007 at 9:51 م
الف الف مبروك يا نورا …….. على الكلام الجميل ده واحب انبه سيتك لحاجه ان اكتر المتضريريين من الموضوع ده هما الولاد بس الي هم احلى 3 حجات في الدنيا المهم يعني البنات مش متضريرين وبيتكلمووا قوليلي لييه….
اقولك ليه.. لأن يا ستي الشباب الموئدب الي زيينا بيخروج الساعه 10 ويرجع على 3 او 4 ازا ما كنش وش الفجر
المهم الواحد الطبيعي بيرجع يستحمه ويوضب نفسو بس هنا في مدينة الواق واق
الواحد بيموووووووووووووت وبينام معفن
وواحنا برضوا المتضريرين قوليلي لييه
اقوليك لليه برضو عشان احنا الي بننزل نيجبلوكو المايه من اي محطه قريبه
يعني في الاول وي الاخر احنا الي متضريريين بس
واخيرا احب اقولك ان الكلام ده انا لحد ناااو مستغرب انو طلع منك ازاي نورا تكتب….. شببابيشو مشميش= لا حول ولا قوه الا بالله
البلد باظت يا جدعان
وشكرا شكرا شكرا
في يونيو 12th, 2007 at 2:04 ص
ميت الف مليون مبروك يا نورا هانم (جديدة هانم دى) …
بجد موضوعك مهم وحيوي اوي لأنه من واقع مدينة الواق واق (مع انها محسساني اننا في بحيرة البجع )هاهاها…
ولو كنتي جيتي عندنا مدينه (المقطماق واق ) ماكنتيش تقولي الصيف بس , انما هاتقولي صيف شتا ربيع خريف …مين يزود (حلوة مين يزود دي ) هاهاها .
واحب اقولك مبروك تاني وعايزين كده اللي جاي احسن باذن الله .
كل الشكر مع تمنياتي بدوام التوفيق .
في يونيو 12th, 2007 at 2:12 ص
السلام عليكم
اولا الف مبروك يانور على البدايه الموفقه دى وانا معاكى فى كل كلمه قولتيها بجد الواحد نفسه يعمل حاجه لان دى المفروض انها بلدنا بس الواحد مش عارف يصلح ايه ولا ايه كل حاجه فى البلد بقيت بايظه حتى الناس بقى عندهم لامبالاه رهيبه انا برده طبعا بتكلم على بلاد الواق واق بعيد عن مصر خالص دى مصر جنه وكلنا مبسوطين والحمد لله
يلا كفايه كده علشان نقضى الاجازه فى بيتنا
يلا باى
في يونيو 12th, 2007 at 1:58 م
ألف مبروك يا نور علي البداية الجميلة دي. و ربنا يوفقك و تكتبلنا حاجات جامدة كدة علي طول.
أما عن مراسلنا في بلاد الواق واق فيقول أن الحكومة سوف تبدأ في حل جميع المشكلات التي تواجه الشعب خاصة مشكلتي قطع المياة و الكهرباء و قد وضعت الدولة ميزانية 2 مليار قرقر (عملة البلاد) لحل تلك المشاكل.
يا رب يحصل في البلاد التانية.
في يونيو 12th, 2007 at 10:05 م
morsy:
ثانيا الولاد مش احلى 3 حاجات في الدنيا لما تكون الدنيا هي البنات اصلا
اولا شكرا على التعليق الطويل
المهم يالي بتذلنا إنك بتنزل تجيب الميه من أقرب محطة ماتنساش إن البنات هي الي بتتعذب في البيت و تغسل و تطبخ و تنظف بالميه دي…ما علينا مش هدخل في حوار عنصري…ربنا يهديك و تعترف بإننا أحلى كل حاجه في الدنيا دي
و سلامات
في يونيو 12th, 2007 at 10:13 م
khaled:و الله يابني المقطمواق واق دي اصلا مش على الخريطة اعنذارا لكل سكانها بس لما تكون مدينة نصرواق واق بيحصل فيها كده يبقى توقع أي شيء يحصل عندكم…ربنا يعنكم
heba adel:شكرا على التعليق الجميل…و الي المفروض نعمله كتير…أولها نفهم حجم المصيبة الي احنا فيها…و بعدها حاجات كتير ..نعترض و نفكر و نشوف حل مع بعض مش نقسم المشكلة للحي الثامن و العاشر
….بس ابقى بلغ مراسلينا إن الارسال ضعيف و مش واصلنا أي تحسنات مرجوه ..و شكرا على اكثر تعليق ضحكني 
و سلام
Yasser:طبعا مش عارفة اقولك ايه لأنك اندمجت ما شاء الله في الحوار و عملت عملة للواق واق
في يونيو 14th, 2007 at 7:10 م
أولا:السلام عليكم
أما بعد.
ثانيا: واحشتينى يا حبي بقلنا يجي ثلاثه أيام ماشوفناش بعض
و الله يا نور الكلام ده وراه حوارات كتير ممكن توصلنا لحياه موميته يعني الخدمات بهذا الشكل السئ هتوصلنا للخصخصه لتحسين الخدمات و بعد ذلك زياده في ارتفاع الاسعار يصاحبه زياده في فقر الشعب مع طبعاَ ثبات الرواتب و المعاشات أو زيادتها بنسبه لا تذكر مع ارتفاع الاسعار بس هما هيعملو ايه يعني هيقطعو نفسهم ربنا معانا بقا
سلام يا كوكي بقي لحسن شكلي هسخن :>
يلا سلاموا عليكم
في يونيو 14th, 2007 at 7:43 م
السلام عليكم ورحمة الله وبركاتة
بجد موضوع حساس وهو بالفعل شئ مميت
ولكن يجب ان لا نضع الذنب فقط على حكومة الواق واق
بالتاكيد هى عامل اساسى فى تلك الخدمات السيئة
ولكن الذنب ايضا يرجع لنا فنحن لا نقدر الماء فنحن نستخدمها بأسراف كبير
وخاصتا البوابين الذين يقوموا بتنظيف السيارات ويستخدموا الخرطوم
الحمد لله
اما بالنسبة للكهرباء فهى شئ صعب وايضا مميت
ونحن كمعمارييين كيف نستطيع ان نقوم ببناء ابراج من ادوار تتجاوز
ال 50 وال70 دور
ونحن حتى الان نعانى من قطع الكهرباء
فماذا يحدث لتلك الابراج عند انقطاع الكهرباء
والاسنسير هو الوسيلة الوحيدة للتنقل التى تعمل بالكهرباء
ولكن الحمد لله على كل شئ
في يونيو 16th, 2007 at 4:28 م
السلام عليكم
..المهم إن انا اصلا مش بعاني من مشكلة الميه علشان هي دايما بتقطع بليل و انا بنام بدري :$ ..بس طبعا شكرا على التعليق الجميل ده
mira:طبعا يا حبي حاجة ميمته…وبس الموضوع دخل معاكي في درس اقتصاد و احصاء
yassmin:و الله يا قلبي العاقلة الي فينا
…تعليقك تقريبا الوحيد الي طلعنا غلط…بس يا ستي يمكن ربنا يحلها من عندوا و ربنا يسهل للحكومة 