لو لم أكن مصرية ..؟!!
….لو لم أكن مصرياً لوددت أن أكون مصرياً …جملة عظيمة لرجل أعظم ..مصطفى كامل
طبعاً الموضوع مش عن لو ماكنتش مصرية كان نفسي أكون ايه؟
بس هو كان حوار مع نفسي كده…قعدت اتخيل لو ماكنتش انا كان نفسي أكون مين ولا ايه ؟!!
ايه اللي مش راضيه فيه عن نفسي؟؟…ايه اللي مقدرش استغنى عنه في حياتي؟؟
مين اللي نفسي أكون زيه؟؟….و مين اللي عمري ماتمنى اكون زيه و ليه؟؟
ايه اللي بيأثر في حياتي ؟؟…و ايه اللي مالوش اي أهمية ؟؟
ليه أصلاً فكرت في كده ؟؟…
اسئلة كتير..لو مكنتش مصرية ؟؟لو مكنتش بنت ؟؟لو مكنتش في كليتي دي؟؟
لو كنت أغنى ؟؟لو كنت أفقر؟؟لو ماكنش ليه أصحاب ..أو لو كان ليه أصحاب غير الحاليين؟؟
لو كان أهلي غير الحالين؟؟لو ماكنش ليه أخوات ؟؟
مش هطول عليكوا في الاسئلة …بس هديكوا حبه اجابات علشان تعرفوا اللي في دماغي 
مثلاً لو ماكنتش مصرية ..قعدت اتخيل نفسي بكل الجنسيات و اقول يا سلام لو كنت كذا ولا كذا …و في الاخر عرفت إني لو ماكنتش مصرية كان زماني مصرية ..حيث لا مفر ..مانفعش غير كده
لو كنت أغنى أو افقر …يمكن ماكنتش هبقى راضية بحالي…يمكن كنت ابقى مغرورة (على اساس إني مش مغرورة)
لو كان اهلي غير الحاليين(مش علشان مش عايزاهم بالعكس انا ماليش غيرهم)…بس ده مجرد تخيل ..يمكن مش هيكونوا طيبين ولا هايعملوني كويس أو حتى يتقوا ربنا فييه ….يمكن كمان تخيلت لو أهلي كانوا أهل اي حد من اصحابي…بجد لا كانوا هيستحملوني و لا انا انفع اكون بنتهم…و مع اهلي الاصليين بجد انا حاسه إني مميزة و فخورة بيهم و ربنا ما يحرمني منهم
و اكتر تخيل كان مضحك.. لو ماكنتش بنت ….من غير معلق كتيير ..الموضوع ماينفعش خالص .. لا شخصيتي تنفع تكون بتاعة ولد ..ولاا حته انا عايزة اكون ولد..البنات بتتعامل احسن كتير (انا سمعت إن الرجاله بيدوروا على جمعية علشان ترجعلهم حقوقهم اللي بتروح و اللي راحت )
اما بقى لو ماكنتش في كليتي دي …فى ده معرفتش اتخيلوا …لأن لو ماكنتش دخلتها كان زماني وقفت تعليمي …
و اكتر تخيل كان مؤثر ..لو ماكنش ليه اصحاب زي الحاليين؟…مش هقول الحياة كانت هتبقى مملة ..بس هقول كنت هبقى واحده تانية خالص …بجد اصحابي فرقوا معايا حتى في نوع الحياة اللي احب اعيشها …و إن ماكنوش دول أصحابي ..مش هتخيل غير إني كنت هتمنى إني أكون صاحبتهم
اما عن اهم اسئلة سألتها لنفسي …و هي ايه اللي مش راضيه فيه عن نفسي؟…و الرد هو كل عيوبي و اللي البشرية كلها عارفها فلا داع للفضايح
و ايه اللي مقدرش استغنى عنه…طبعاً مقدرش استغنى عن أي شيء في حياتي لأن كل شيء عندي لو أهمية و له مساحة عدم وجودها يفرق كتير معايا….بس دايماً يكون في حاجه من غيرها اي شيء مش هيكون له معنى و حياتنا من غيره بدون قيمة..و اعتقد إن ده مبدأ عندنا كلنا و هو ربنا …لأن بجد ربنا هو خير من تكلمه في زنقتك و خير من تشكره لما يفرجها عليك و خير من تشتكيله و يقدرلك الخير ..فالحمد لله على نعمة التوحيد
خلاصة الموضوع انا ليه اصلاً فكرت في كده …طبعا مش من فراغ ولا علشان قاعده فاضيه …بس ساعات الواحد بيحب يتكلم مع نفسه علشان يقنع نفسه بحاجات مش راضي عنها …و يا ريت كل حد يعد مع نفسه كده و يعد يتخيل لو هو مش راضي عن حاله طيب كان نفسه يكون ايه؟
و بجد في الأخر لازم هتقتنع إن اللي انت فيه ده أحسن حال ..و إن لو كان في حال أحسن من كده ربنا ماكنش هيبخل عليك و كان هيقدرهولك….ربنا خلق كل انسان بقدرة تحمل فبيديلوا على قد قدرته ..و بجد في أخر الحوار انا مكنتش انفع غير إني أكون نورهان ….
الفخورة بنفسها ..نورهان حسن
في أغسطس 5th, 2007 at 12:30 م
السلام عليكم ورحمة الله و باركاته
الموضوع جامد جيدا يا نور و يا رب ينور طريق كل واحد مش راضي عن حاله
و اهم حاجة ربنا يخلي ليك اهلك و يخليكي لاصحابك اللي هما احنااتمني اني اشوفك علي خير قريب مش في الكلية يا نور ماشي
في أغسطس 5th, 2007 at 3:09 م
السلام عليكم ورحمة الله وبركاتة
الموضوع جميل ما شاء الله
واعجبنى ان فكرة الموضوع هى الرضا
وما أجمل هذا الاحساس
احساس جميل لحمد لله على نعمة الكثيرة
وللاجتهاد لكى نكون أفضل
وان شاء الله نكون دائما فى تلك الصحبة
” لو ماكنش ليه أخوات ؟؟ ”
اين الاجابة !!!!! 
والسلام عليكم
في أغسطس 5th, 2007 at 3:09 م
مواضيعك كلها جديدة و غريبة يا نور بس بجد تحفة.
أنا شايف إن تخيل حاجة ماحصلتش ده شيء جامد جداً و بيوسع الأفكار لو فضلنا نبحث في المكان اللي بنتخيله ده.
التخيل ده حاجه جامدة جداً طبعاً الكلام ده بعيد عن الوصفية
و في النهاية الموضوع بجد حلو جداً (كالعادة) و يا رب دايماً.
في أغسطس 5th, 2007 at 4:46 م
السلام عليكم ورحمة الله وبركاتة.
عارفة ان انا بقالى كتير مدخلتش واكيد غبت عليكوا اوى واكيد وحشتكوا اوى هوعدكوا من انهاردة مش هغيب كدة.
المهم بقى الموضوع جامد اوى يانونا وبجد الواحد بيعد مع نفسة كتير ويسال الاسئلة دى واهم سؤال بسالة لنفسى انا مقصرة مع ربنا ولا لأ؟؟؟؟؟؟؟؟؟؟ ومقصرة من ناحية مذاكرتى وكدة؟؟؟؟؟؟؟بس الحمد لله على كل حاجة ويارب يدمها نعمة واهم حاجة تقولهنا لو مكانش عندك الاختين الحلوين كنتى هتعملى اية ؟؟؟؟ يلا مش عايزة اطول عليكوا
يلا سلااااااااام
في أغسطس 5th, 2007 at 8:10 م
السلام عليكم
hadeel mahfouz:شكرا يا هديل..و عايزة اقولك بجد كل انسان من فترة للتانية بيحتاج يعد مع نفسه كده علشان يراجع حسباته و يشوف هو ماشي في الطريق الصح و راضي عن اللي بيعمله ولا لأ
ياسمين منير:يا جامدة يا ياسو ..فهمتي المغزى من الموضوع
بصي الرضا ده نعمة مش أي حد ينولها و مش بينولها غير اللي عايزها ..و علشان كده لازم كل شوية نعد نقنع نفسنا بحاجات مش حاسيين بيها علشان نرضى عن نعم كتيير احنا مش واخدين بالنا منها 
و بعدين لو ماكنش عندي اخوات كان زماني هادية و عاقلة و رزينة كده …بس بجد من غيرهم كانت الحياة ملهاش اي طعم 
و إن شاء الله الموضوع اللي جاي يعجبكوا آوي لأنوا أصلاً بناء على طلب الجمهاير 
و شكراً على تعليقك ..و مش عارفة ليه كلوا بيسأل حياتي من غير اخواتي كانت هتبقى ازاي؟ هم مضايقنكوا في حاجة دول ملايكة 
Mohamed Yasser:شكراً يا ياسر انت من الشخصيات المؤثرة في المدونة بشكل كبير..طبعاً التخيل من غيره انا ممكن اموت لأن اصلاً عايشة في الوهم و الخيال
NONA:طبعاً يا نونا المدونة من غيرك دمار ..ده محدش بقى بيكتب اصلاً
في أغسطس 5th, 2007 at 8:32 م
ربنا يكرمك يا نور بجد الموضوع ما شاء الله تحفه
و لو كل واحد رضى باللى هو عليه ماظنش ان هيبقى فى مشاكل خالص
عقبال الموضوع الجاى و كل مره تفكرينا بحاجه مهمه ممكن نكون نسيناها
في أغسطس 5th, 2007 at 9:13 م
السلام عليكم,,
و ظهر وجه نورهان العاقلة ..
( مش اوي يعني) بس احسن من قبل كده
محمد
في أغسطس 5th, 2007 at 9:44 م
السلام عليكم
…و بعدين أصلاً انا طول عمري عاقلة بس بداري علشان الحسد ..بس يا رب اكون بتتطور بجد .. و شكراً انت مش متخيل انا مبسوطة ازاي بتعليقك 
yummy:شكرا يا حبي…واضح إن لو كل واحد رضي عن نفسه كانت القيامة تقوم لأن كده هنبقى ملايكة…بس ادينا بنحاول نقرب من ربنا علشان يقرب مننا
محمد عبد الشكور:مش مصدقة ..أخيرا موضوعي نال إعجابك
في أغسطس 5th, 2007 at 10:58 م
السلام عليكم
على فكرة الموضوع حلو اوى و هيعلم الناس ترضى و انت طبعا القدوة الحسنة ليا انا و رارا و ابيه ومش عارفة الجملة الى انت قولتيهالى التهاردة ان احنا ليه انا و رارا و ابيه ماشين وراكى طول اليوم تقسى اعرف السبب يا ريت تقوليلى
سلام
في أغسطس 6th, 2007 at 1:32 ص
100%نورهان صنع فى مصر ( جااااااامد )
7elmy……………..
في أغسطس 6th, 2007 at 3:07 ص
السلاموا عليكم
بجد موضوعيك جامد و أحلي نعمه في الدنيا هي بجد الرضا علي النفس و انك تكوني واثقه و موحده بالله
و حلو أوي انك توعودي تفكري كده و بجد كمان أنا مش متخيله يكون ليا صحاب غيركم:$ بجد والهي و هتوحشيني لحد لما أشوفك تاني
في أغسطس 6th, 2007 at 11:01 ص
السلام عليكم
lolo:شكراً يا لولو ..و بعدين اكيد اختكم قدوة حسنة ..علشان كده طول اليووم بتلفوا ورايا يمكن تبقوا زيي
mohamed mostafa:شكرا يا حلمي..يا ابني ده فخر و وسام شرف كده إني منفعش غير مصرية ..و بعدين انت كده اتأخرت آوي بموضوعك !!
mira:شكراً يا حبي…والله بجد اكتر حاجه تحسسك بنعمة الرضا هي لما تشوفي التعاسة اللي بيكون فيها اي حد بسبب انه يكون ناقم على النعم
و إن شاء الله نشوف بعض قريب يا قلبي 
في أغسطس 7th, 2007 at 3:09 ص
لو لم اكن مصرية ؟مم معتقدش انى كان ممكن ابقى حاجة غير مصرية
لو مكانش ليا اخوات !!كان ممكن اتجنن..ربنا يخليهملى 
وطبعاً اهم سؤال 
لو لم اكن بنت !!! بجد عمرى ما تخيلت ابداً ماكونش (ليدزى نيرمو 
)
)
لو مكنتش فى كليتى دى !!…اعوذ بالله ايه الافكار الوحشة دي :S
لو كنت اغنى او افقر!! الحمدلله راضية بحالى…
لو كانوا اهلى و اصحابى غير الحالين !! اكيد كنت هبقى شخصية مختلفة يمكن احسن يمكن اسوأ..بس الحمدلله اهلى واصحابى بجد دول احلى حاجة فى دنيتى
الموضوع حلو اوى يانور ويارب نفضل راضين بحالنا دايماً ومفيش مانع من فتره تخيل بس بعيداً فعلاً عن الوصفية و (الجزء الاول من النبراس
في أغسطس 8th, 2007 at 7:07 ص
السلام عليكم ورحمة الله وبركاته
) .
) بس انا حاسس انه موضوع متميز وجديد .
اولاً يا نور اعزريني على التأخير بتاعي ده . اصل بيتنا ولع عقبال عندكم جميعاً(يووووووووه!! قصدي بعد الشر
الأجهزة كلها ولعت والكمبيوتر وحالتنا صعبة اوي.
وثانياً انا مالحقتش اقرأ موضوعك لأني مش في بيتنا (هاجج بعيد عن القاريين
وان شاء الله اول ما الوضع ينصلح هاقرأه واكتب تعليق برأيي ولكل اللي كتبوا في المدونة .
وماتنسيناش في الدعاء بقى .
سانتراكاتوووووووووووووووو .
في أغسطس 8th, 2007 at 1:40 م
السلام عليكم
و بعيداً عن النبراس و الوصفية اللي جايبلكوا الهسهس !!
nariman:انونوووو…احلى رد لعلمك وصلني على الموضوع اللاشا ده
انت احلي ليدزي يا نونو(و ميرا طبعاً)..حاسة إني جوزكوا و ماينفعش افرق بينكوا
خالد محمد:و عليكم السلام…انا برده استغربت مش من عوايدك يا خالد تختفي كده!!
عمتاً إن لله و إن إليه راجعون في بيتكم و إن شاء الله ترجعله بالسلامة ..و بجد شكراً إن رغم الظروف دي طليت على المدونة و شوفت موضوعي
في أغسطس 22nd, 2007 at 8:27 ص
ohhh at the begining i thought that i am reading a light topic but after a while i realized that its really an importante one that affects in soo many people as your topics always do to us you talked in a serious problem most of the people are not satisfied by their satuation but they never think why ir whats better ? thank u really for that wonderful topic
في أغسطس 31st, 2007 at 9:53 م
nanoush:
look i used to handel any topic in a light way to have attention
first of all thank u for this comment
coz serious topics not z favorite to most people
and what really makes me satisfied when this topic makes anyone thinks of his or her situation and realize that theirs is z better anyway
في سبتمبر 1st, 2007 at 4:02 م
really interesting and makes me think
thank u Allah for making me “me” and no one else
thank u Allah for the countless gifts u have given me
thank u Allah for the things u deprived me of
and thank u Allah that u made us believe in U only U and no one else
في سبتمبر 1st, 2007 at 8:25 م
maha:thank u maha for z thankful comment
but the big thanks is that u mentioned (the countless gifts that were given to us )
coz the gifts not only vision ,hearing or walking
the real gifts is that we r as we really r
the real gifts is our personality .our families and every single thing that we live with
really thank u for mentioning such a great thing like this