انت يا هذا .. قولي لماذا؟!!
..الموضوع ده شاغل دماغي من فترة كبيرة أوي ..ليه بنختار خطوات معينة في حياتنا وهل ده بيوصلنا للي احنا عايزينه ..وهنكون ازاي بعد فترة من الزمن..هل كل واحد فينا عنده هدف عايش ليه ولا مش لازم أصلاً يكون لينا هدف والحياة هتستمر عادي..
..ولما وصلت لمرحلة اللا اجابة قررت أشوف اللي حوالية بسؤال بسيط بيفكروا في الموضوع ده ازاي..والسؤال ده سألته ليمكن 20-25 واحد في الدفعة ((ناويين يطلعوا ايه بعد لما يتخرجوا؟))..ولقيت اجابات مختلفة بتدل على أساليب مختلفة من التخطيط المستقبلي وكانت كالتالي:
-
في ناس وقف تخطيطهم لنفسهم عند مرحلة ظهور نتيجة التنسيق في الثانوية العامة ولما سألتهم كانت اجابتهم بمنتهى البساطة ((انت شافية احنا في كلية ايه؟!)).. طب مانا عارفة احنا في كلية ايه وان كليتنا بتخرج مهندسين !!
-
في ناس جاوبت بمنتهى الثقة احنا عايزين نطلع مهندسين أو مصممين معماريين ورغم إن المجموعة السابقة كانت بتتميز بثقة فظيعة إلا إن المجموعة التانية كان فيها ثقة ورؤية مستقبلية تحس فيهم عارفين هيوصلوا ازاي للهدف ده((ورغم إن عددهم أقل من أصابع اليد الواحدة وأغلبهم مش من أوائل التصميم المعماري!!))
-
وأغلبية اللي قابلتهم جاوبوا اجابات مختلفة بين أهداف بعيدة تماماً عن العمارة وبين أهداف تلي فشلهم في حصولهم على وظيفة في العمارة ورغم إن كان ليه الاختيار ده من الأول إلا إني عجبني تحديدهم لهدفهم من دلوقتي..
في يونيو 30th, 2009 at 3:02 م
جامد جيدا يا نور بس في كل مكان ممكن يكون في تفاوت في الاهداف و الطرق في تحقايقها
و ما اظن ان في حد ممكن يعيش من غير هدف او طموح في المستقبل و حتي لو هو حاسس انه مش عنده هدف افتكر انه بيكون عنده هدف بس هو مش شيفوا او مش مقتنع به و عايز يغيروا
المشكلة ان في ناس اخر طموحتهم انهم ياخدوا الشهادة في حين ان ده بيعتبر بداية المشوار و الطموح مش نهايته
يا رب كلنا نعرف اهدفنا و نسعي للتحقيقها
شكرا يا نور و كده تكون اماندا نجحت في انها تشجع رواد المدونة انهم يعود اليها من جديد
=)
في يونيو 30th, 2009 at 6:31 م
السلام عليكم
ده أولا ، أنا بفتح المدونة وانا حاسة ان فى حاجة حلوة والحمد لله احساسى ما خانيش .
،بس فى حاجة مهمة تانية وهى لو عندك هدف مثلا بتحاولى تحقيه ازاى ، ممكن تكون المشكلة رغم انك عارفة عايزة تعملى ايه ان انتى تحققيه ازاى ، أصل الكلام جميل وبيريح كتير 
بس الأأجمل والأجمل انك تنجحى فى ترجمته لحقيقة ، عارفة أنا هقوم أشوف الورقة تانى دلوقت و ابدأ افكر فيها تانى.
هييييييييه هييييييييييه هييييييييه
بصى بقى انت اتكلمت فى موضوع مهم جدا وحلو جدا، انا بحس ان الهدف ده هو البنزين اللى البنى آ’دمين بيمشوا بيه ، وأنا فى أولى ثانوى قررت أعمل الموضوع ده فعلا ،وكتبت اللى أناعايزة أعمله فى ورقة علقتها على بورد فى البيت ، ومن وقت للتانى بشوفها صدفة وتصدقى لقيت أهدافى واحدة ما اتغيرتش ، يمكن فى حاجات بتزيد ززبتطور بس الأساس ما بيتغيرش
حاجة حلوة: أنتم وشكوا حلو أوى عليا أنا أخدت المركز التانى فى مسابقة كتابة على مستوى جامعة حلوان ززباركولى بقى
وسلام..
في يونيو 30th, 2009 at 7:08 م
Hadeel Mahfouz: أولاً شكراً…انا بحس إن طموح الناس الضعيفة ده نوعين :
1.عيب خلقي مولودين بيه وده علاجه زي أي عيب تاني بالتمرين و بالتحفيز
2.عامل مكتسب وده من العوامل المحيطة وده علاجه يا نكون أقوى من اللي حوالينه يا يبعد عن العوامل المحيطة السيئة .
وطبعاً كله عنده هدف بس مش كله بيكبر هدفه قدام عنيه عشان يوصله و مش كله بيخطط ازاي يوصل لهدفه..وده الفرق اللي بيحسسك انت عايشة ولا انت ايه بالظبط!!
Amanda :عارفة يا أماندا في جوه ورا الكواليس عند التدوين و أكيد انت شوفتي الموضوع ده ((موضوع الأوسمة)) انت تستحقي فعلاً وسام .
طبيعي يكون ليك هدف أساسي مبيتغيرش وحواليه أهداف صغيرة بتوصلك ليه زي الدراسة والثقافة والنجاح في الحياة علشان توصلي بالسلامة في الأخر ..
شعورك القوي بالحاجه لهدفك من غير ما تشعري بيوصلك ليه سواء بخطوات واضحة أو بتلقائية
لأن شعورك القوي ده بيخليك تشوفي هدفك كأنه أمر واقع وكأنك لو حركتي ايدك هتلمسيه
انا جربت الاحساس ده فعلاً ده حقيقة مش سرح..
سلام
في يونيو 30th, 2009 at 11:35 م
نورهان :
أخدت وقت لحد ما استوعبتها ، ولما فهمتها اقتنعت لحد كبير 
ويارب يعينا كلنا على اللى فيه الخير منها:)
وحتى لو كان سرح فهو عجبنى
(شعورك القوي بالحاجه لهدفك من غير ما تشعري بيوصلك ليه سواء بخطوات واضحة أو بتلقائية
لأن شعورك القوي ده بيخليك تشوفي هدفك كأنه أمر واقع وكأنك لو حركتي ايدك هتلمسيه )
جملة بليغة
إلى الأمام يا نور فى كل أهدافك وكل موضوعاتك
في يوليو 1st, 2009 at 10:01 م
محجوز !
لي عودة في اقرب اوقت افضي فيه ان شاء الله عشان في كلام كتيير ممكن يتقال في الطرح الكويس ده.
محمد
في يوليو 2nd, 2009 at 8:19 م
أماندا :بجدمش سرح و لم تجربيها هتبقى تجربة حياتك و هتحسي إن ده كان أحلى هدف وصلتي ليه..
محمد عبد الشكور: اطمن محدش هياخد مكانك ولا هيكتب بعدك الموضوع بقاله كذا يوم على الحال ده لدرجة إن انا نفسي مش بدخل اشوفه!!
في يوليو 3rd, 2009 at 12:14 ص
يا نور وحشتيني أوي
ندخل ف إلموضوع بئة .. وبغض إلنظر عن إن كلنا دخلنا كلية معروف أنت هطلع إيه !! بس فعلن في ناس ود أنا منهم مش أول اهتماماتي أني أكون مهندسة أو في مجال إلعمارة .. أنا هدفي ومن قبل مدخل إلكلية أني أكن في مجال إلأعلام بس مش معنى كدا إن في إلكلية بنتعلم حاجات ف حياتنا بعيد كمان عن إلعمارة بس ف حياتنا كلها .. وممكن بعد منتخرج نلاقنىا رحنا ف حتة تانية خالص محدش يتوقع إن فلان مثلن اشتغل كذا أو في بلد كذا
بس فعلن واهم حاجة إل واحد يعرف هو عايز إيه في مستقبل وفحياتو ومش لازم إلحاجة دي هتحصل بعد فترة طويلة لازم تعرف أنت عايز اى ف كل موقف ف حياتك ..عرفة أني محظوظة علشان عرفت ناس زيكو و بفتخر بيكو و حيفضل احساسي دا ديماً موجود ..
شكراً يا نورهان .. و مستنيين كل جديد
في يوليو 3rd, 2009 at 12:14 م
هدى : أولاً وحشتيني جداً جداً..فعلاً نسيت إن ممكن الواحد يكون مخطط لحاجه و كذا هدف كمان و في الاخر يبقى مستقبله في عالم تاني خالص ..وعجبتني أوي إن الواحد لازم يكون مخطط لكل حاجه في حياته مش شرط بس مستقبله المهني ده كمان المفروض الواحد يخطط كمان لكلامه اللي هيقوله لان كل تفصيله صغيرة ممكن تأثر على حاجات تانية مهمة واحنا مش واخدين بالنا..
سلام
في أغسطس 28th, 2009 at 11:55 م
[...] انا لسه فاكر تعليقى المحجوز في موضوعك يا نورهان هو يمكن كان عندي كلام كتيير اناقشة في [...]