مش بالكلام…
….رغم اتسام جيلنا بالصراحة و الجرأة في أغلب الأحيان إلا إننا لازلنا نفتقد لغة التواصل الصحيحة..
المعتاد إن علشان تصالح حد زعلان منك تقوله انا اسف و علشان تعرف حد انك عايزه تقوله وحشتني و غيره من الكلمات المعبرة عن المشاعر المختلفة..لكن مش دي بس الطريقة الكافية ان الانسان يعبر عن مشاعره …و مش شرط الانسان يكون قادر يعبر عن مشاعره ..لان كل انسان له طبيعة مختلفة و كل موقف له عوامل مختلفة.
اعرف واحدة علاقتها بوالدتها كانت نص نص كده و مامتها كانت دايماً فاكره انها بتكرها و على الرغم من إن البنت دي كانت دايما بتدعى لمامتها كل يوم قبل ما تنام بكثير من الدعاء الصالح و رغم موقف لا يوصف إلا بالصدفة البحته اللي عرفت منه مامتها دعاء البنت دي مكنتش المعاملة بينهم اتغيرت و بقت فوق الخيال..
مش عايزة اضرب امثلة كتير او ارغي اكتر بس نفسي كل واحد فينا يحسن الظن بأهله و أصحابه ..يمكن يكون فاهمهم غلط.. يمكن نكون فاكرين اننا مش غاليين على اصحابنا و هم بيدعولنا من ظهرنا… يمكن نكون فاكرين اهلنا بيضغطوا علينا و هما هيموتوا علينا و اننا نكون احسن ..
الموضوع ده دعوة لكل حد فينا يقدر ظروف اللي حواليه و يعرف ان لو اللي بيحبه مش جنبه يبقى اكيد بيدعيله مش استغنى عنه!!
وإن لو متوقع من صاحبك أو اخوك اكتر من اللي بيعمله و بتقلل من مجهوده ..انت متعرفش يمكن ده كل اللي يقدر عليه..
يا ما ناس كانت فاكرة إن الأغراب هما اللي بيسألوا عليهم في زنقتهم و إن أقرب الناس ليهم مش جنبهم رغم إن أقرب الناس ليهم بتعمل زي ما بيقولوا (شغل ما وراء الكواليس) …
اتمنى بعد الموضوع ده نسأل على اللي نسيناهم و نحسن الظن في اللي مش بيسألوا علينا لأن الله أعلم بظروفهم ..وادعولي انا كمان اكون كده!!
صديقتكم
نورهان
في يوليو 29th, 2009 at 11:38 م
( الموضوع ده دعوة لكل حد فينا يقدر ظروف اللي حواليه و يعرف ان لو اللي بيحبه مش جنبه يبقى اكيد بيدعيله مش استغنى عنه!!) ياريت الكلام دة يوصل بجد لكل الناس عشان الصداقة والعلاقات بين الناس مش متوقفه ابداً على البعد و القرب او السؤال والتجاهل..يمكن اقرب الناس ساعات بيكونوا من ابعد الناس مسافة بس ده مبيغيرش انهم اقرب الناس …
عشان نحس بيهم اننا غالين عند بعض
بس طبعاً مفيش مانع من شويه اهتمام
-كل سنه وانتى طيبه ووحشتينى انتى ورغيك ده
في يوليو 30th, 2009 at 12:54 م
يا سلام ..:) هو فعلا مش بالكلام..
اننا ندعى لبعض ونفرح ونزعل لبعض ده أجمل حاجة فى الدنيا ..
الموضوع جميل أوى ..، التواصل ده لغة خاصة بكل واحد فينا ، وكل واحد بيعبر عن مشاعره بطريقته ،بس فى الآخر لغة التواصل المشتركة هى المطلوبة ، انك تسألى حتى بالتليفون على الناس ويطلعوا فعلا محتاجينلك أو محتاجين لسؤالك ده ،أو فجأة صوت ناس بقالك كتير ما شوفتيهمش يفرحك …:)
وجميل أننا نفتح عقلنا ونستقبل المشاعر الحلوة ، ونحاول نقدر اهتمام اللى حوالينا ونفهمهم بأسلوبهم ..:)
ونتواصل بدون وصل …
شكرا يا نور على المجهود العظيم ده ؛)
في يوليو 30th, 2009 at 3:22 م
ناريمان: و انت طيبة يا بنتي و وحشك رغيي لكن انا موحشتكيش واضحة جداً يعني
عارفة انا بتكلم عن الناس اللي بتلاقيها اختفت و تعدي تقولي ازاي نسيتني و ازاي مبتسألش عليه و ازاي عرفت ان عندي مشكلة و مش بتكلمني و على الجانب التاني صاحبتك دي عندها ظروف متسمحش انها تكلم في الوقت ده و بتدعيلك و زعلانة جداً انها مقصرة في حقك!!
اماندا: يا اماندا يا بنتي عارفة ليه مش بالكلام عشان ساعات كتير الكلام بيتفهم غلط ..لأ مش ساعات ده انا من الشخصيات اللي بتتفهم غلط على طول!!..
و كان فيه دكتورة في لغة التواصل بتقول ان لغة الحسم افضل بكتير من الكلام لانها اصدق بكتير ..و اصلاً الموضوع عن لغة الصمت!!
المهم من الموضوع اصلاً إن مش مهم اللي حواليه بيعاملوني ازاي حلو او وحش لازم اطزن احسن منهم و ادعيلهم و اسأل عنهم على قد مقدر مش اردلهم معاملتهم فقط!!
في يوليو 30th, 2009 at 7:10 م
بجد مش عارفة اقول اية بس كلامك صح قوى
لان مش دايما الواحد بيعرف يعبر بالكلام بس بيعمل حاجات ممكن تكون مش حاسس بيها او مش واخد بالك ازاي هو تعب في الحاجة دي
و بالنسبة ل اماندا اكيد طبعا بتكون حاجة كويسة انك تسمعي صوتهم في وقت انت محتاجة لكده
و كل سنة و انت طيبة يا نور =)=)