الظلام يتحول لأرواح شفافة تنسحب من القلوب والأبدان بقدوم اليوم الجديد..،
الأشجار لم تعد تخيفنى كما السابق..انغماسها فى الأسود يكسبها أشياء من
الغموض الذى لا يحبه البشر دائما….. ، يملكها أساليبا للتخويف ، فتحمل هى
أسواطه…
ألوان الظلام تنسحب تدريجيا قليلا قليلا من وجه الكون…،الأسود يتعادل فى
اختلاطه مع الأزرق فيترك السماء رمادية نصف مصمتة..
الأشخاص والعيون والسماء و الأيام و احساس الخوف المفرط و أمنيات الأمان
المفرط والحلم والحقيقة و الغيب الذى لا يعلمه إلا الله…ما بين ذهاب الأسود و
تملك النور …
العصافير قد شعرت بما شعرت به القلوب النائمة ..أدركت الجديد فغنت له وتغنت
به …،دعوات السلام والمحبة تملأ الكون الواسع ..
لم يعد لون الظلام واستيقظت المنازل…
الأشخاص تسعى لا تذكر شيئا حزينا من السابق ..هى لم تكن أبدا قبل هذا
الصباح الجديد..

رمضان كريم

الى كل اخوانى و اخواتي في كليتنا, كلية الفنون الجميلة و أخص بالذكر دفعة ثالثة عمارة (ان شاء الله) -ثانية عمارة سابقاً :)-
حبيت اشارككم رمضان و اقول لكم كل سنة و انتم طيبين,  و الحمد لله ان احنا لسه متجمعين على الخير.

كل سنة و انتم مسلمين, كل سنة و انتم متجمعين على الخير, كل سنة و انتم بتمام الصحة و العافية
كل سنة و انتم طيبين.

رسائل سريعة 
- ليكن رمضان السنة دي بداية لتنشيط الاتيلية بتاعنا من جديد طوال السنة الدراسة القادمة و مش مجرد الاجازة بس و يكون له اسهام مؤثر في الدراسة ان شاء الله.
- في تجديد قريب في الاتيليه هيسهل التعامل لينا كطلبة كلنا ان شاء الله و مواد تخصصنا و كل اللى بيجمعنا.

- انا بعتذر انى مقدرتش اشارككم في تنشيط المدونة لظروف اغلكبم يعرفها و الحمد لله رب العالمين و لكن انا كنت متابع بشكل دوري كل اللى بيحصل هنا.

- انا لسه فاكر تعليقى المحجوز في موضوعك يا نورهان
هو يمكن كان عندي كلام كتيير اناقشة في الموضوع و لكن الجايات اكتر ان شاء الله

- هو فين الباقي!
فين يا اخواننا بقيت الناس اللى كانت بتشارك سواء بالموضوعات او التعليقات هو مفيش غير 3 او 4 هنا و لا ايه ؟

تنوية رمضاني واجب..
و انا بكتب الموضوع لقيت تدوينة بانتظار المراجعة من اختنا “sara ss”
و خير ما يمكن فعله هو دمج التدوينة هنا و من سارة :
“كل سنة وانتم طيبين بمناسبة الشهر الكريم وان شاء اللة ينعاد عليكم بخير…..سارة”
شكراً سارة !
كل سنة و انتم طيبين و حصلت لنا البركة

__محمد عبد الشكور

     المعتاد إن علشان تصالح حد زعلان منك تقوله انا اسف و علشان تعرف حد انك عايزه تقوله وحشتني و غيره من الكلمات المعبرة عن المشاعر المختلفة..لكن مش دي بس الطريقة الكافية ان الانسان يعبر عن مشاعره …و  مش شرط الانسان يكون قادر يعبر عن مشاعره ..لان كل انسان له طبيعة مختلفة و كل موقف له عوامل مختلفة.

     اعرف واحدة علاقتها بوالدتها كانت نص نص كده و مامتها كانت دايماً فاكره انها بتكرها و على الرغم من إن البنت دي كانت دايما بتدعى لمامتها كل يوم قبل ما تنام بكثير من الدعاء الصالح و رغم موقف لا يوصف إلا بالصدفة البحته اللي عرفت منه مامتها دعاء البنت دي مكنتش المعاملة بينهم اتغيرت و بقت فوق الخيال..

     مش عايزة اضرب امثلة كتير او ارغي اكتر بس نفسي كل واحد فينا يحسن الظن بأهله و أصحابه ..يمكن يكون فاهمهم غلط.. يمكن نكون فاكرين اننا مش غاليين على اصحابنا و هم بيدعولنا من ظهرنا… يمكن نكون فاكرين اهلنا بيضغطوا علينا و هما هيموتوا علينا و اننا نكون احسن ..

     الموضوع ده دعوة لكل حد فينا يقدر ظروف اللي حواليه و يعرف ان لو اللي بيحبه مش جنبه يبقى اكيد بيدعيله مش استغنى عنه!!

    وإن لو متوقع من صاحبك أو اخوك اكتر من اللي بيعمله و بتقلل من مجهوده ..انت متعرفش يمكن ده كل اللي يقدر عليه..

    يا ما ناس كانت فاكرة إن الأغراب هما اللي بيسألوا عليهم في زنقتهم و إن أقرب الناس ليهم مش جنبهم رغم إن أقرب الناس ليهم بتعمل زي ما بيقولوا (شغل ما وراء الكواليس) …

    اتمنى بعد الموضوع ده نسأل على اللي نسيناهم و نحسن الظن في اللي مش بيسألوا علينا لأن الله أعلم بظروفهم ..وادعولي انا كمان اكون كده!!

   صديقتكم

   نورهان

 الموضوع مش حساباتك لأقل جزء من الوقت،راح فين وجه منين! بس فى المكان والاتجاه اللى بيعدى فيه عمرنا وتعبنا وإحساسنا….
المواقف القديمة اللى عيشناها فى سنين (حلوة أو وحشة) ،ممكن تحكى عنها دلوقتى فى دقايق ..ممكن تلخص كلام الوقت ده كله فى ( آهههه كان موقف صعب جدا ) :s ، أو ( ياههه دى أيام ما تتعوضش ) :) 

أنت لسه ما نسيتش الأوقات الطويلة ولا الكلام الكتير ، بس بقوا بالنسبة لك ذكرى ..وعدت ،مرتبطة دلوقتى  برد فعل منك محصور فى : زعلان جدا…مبتسم بلا مبالاة..ضحك بكركرة
متعجزش نفسك بتفكيرك فى موقف صعب عدى ، ومتحرمش نفسك من انك تدعى ربنا ببكرة أحلى حتى و أنت فى عز مشاكلك:) ، وخليك فاكر إنها عدت قبل كده ،وبتعدى دلوقت،وهتعدى على خير إن شاء الله:)
لازم نعيش دلوقت ، ومننساش زمان ، ولا نبطل تفكير فى بكرة..بس نهون علينا الدنيا ونصبر….

وخلوها على الله:)

..ولما وصلت لمرحلة اللا اجابة قررت أشوف اللي حوالية بسؤال بسيط بيفكروا في الموضوع ده ازاي..والسؤال ده سألته ليمكن 20-25 واحد في الدفعة ((ناويين يطلعوا ايه بعد لما يتخرجوا؟))..ولقيت اجابات مختلفة بتدل على أساليب مختلفة من التخطيط المستقبلي وكانت كالتالي:

• في ناس وقف تخطيطهم لنفسهم عند مرحلة ظهور نتيجة التنسيق في الثانوية العامة ولما سألتهم كانت اجابتهم بمنتهى البساطة ((انت شافية احنا في كلية ايه؟!)).. طب مانا عارفة احنا في كلية ايه وان كليتنا بتخرج مهندسين !!

• في ناس جاوبت بمنتهى الثقة احنا عايزين نطلع مهندسين أو مصممين معماريين ورغم إن المجموعة السابقة كانت بتتميز بثقة فظيعة إلا إن المجموعة التانية كان فيها ثقة ورؤية مستقبلية تحس فيهم عارفين هيوصلوا ازاي للهدف ده((ورغم إن عددهم أقل من أصابع اليد الواحدة وأغلبهم مش من أوائل التصميم المعماري!!))

• وأغلبية اللي قابلتهم جاوبوا اجابات مختلفة بين أهداف بعيدة تماماً عن العمارة وبين أهداف تلي فشلهم في حصولهم على وظيفة في العمارة ورغم إن كان ليه الاختيار ده من الأول إلا إني عجبني تحديدهم لهدفهم من دلوقتي..

فكرت الاجابات دي بترجع لايه؟ ولماذا كانت الاجابات متفاوتة رغم إن كلنا في كلية واحدة ؟ وهل ده فعلاً اللي هيتحقق ؟..

صادفت في الفترة دي إن عدت عليه كذا تجربة قديمة ناجحة معظمنا نعرفها اثبتت إن الهدف شيء مهم جداً والاصرار على تحقيقه هو الوسيلة الوحيدة للوصول إليه ((ليس نيل المطالب بالتمني ولكن تؤخذ الدنيا غلابا)) والتجارب دي كانت لناس بتعاني مشاكل من بداية طفولتها ودلوقتي دي شخصيات احنا بنضرب بها المثل..

زي اينشتين اكتشفت في اليوم العالمي لمرض التوحد إنه كان طفل عنده توحد وده مرض لما بيجي للأطفال بيتسبب في صعوبة في التعلم شديدة في كل شيء سواء في الدراسة أو الحياة اليومية ومع ذلك مع اصرار رهيب في المعرفة والعلم اعتقد إنه من أشهر العلماء على مر التاريخ.

وزي توماس اديسون العالم المشهور اللي اكتشف المصباح الكهربائي ومنه توصلنا لكل الأجهزة الكهربائية ..لما تقرا قصة حياته تكتشف إن أساتذته في المدرسة كانوا بيتوقعوا له الفشل في الحياة ولم يتقعوا إنه يقدر يكمل دراسته الابتدائية حتى!! .. ومع ذلك مع اصرار منه على الوصول لهدفه وتجاربه العديدة اصبح توماس اديسون المعروف اليوم.

وزي طه حسين ..كلنا اخدنا قصة حياته في ثانوية عامة ..إنه كان مصر على الوصول والنبوغ في العلم رغم إنه أعمي و من عائلة ((على قد حالتها)) و رغم استهزاء أخوته منه إلا إنه قالهم ((اضحكن اليوم وسترين غداً)) وأصبح عميد الأدب العربي..

والسادات اللي أنا بعتبره من أفضل الرؤساء ..قصة كفاحه عظيمة واصراره على تحقيق حياة كريمة للمصرين يشهد عليها كل من كان من عصره ورغم بداياته الفقيرة وتعرضه للاعتقال ..الا إنه اصبح علامة مميزة في تاريخ الوطن العربي والدليل على كده حصوله على نوبل للسلام.

أمثلة كتير على ناس كان ليها هدف ووصلت لهدفها بسبب اصرارها طبعاً بعد توفيق ربنا..بس الناس دي كان عندها مشاكل و كمان كان هدفها كبير أوي ..احنا الحمد لله مشاكلنا مش للدرجة وهدفنا ((حسب كل واحد))بس برده على قدنا..

الحقيقة الموضوع ده علشان أنا عدت عليه فترة مش قليلة كنت حققت كل أحلامي وأصبحت بلا هدف وكان شعور ممل فيه نوع من السذاجة وعدم الرغبة في الاستمرار لكن برجوع الأهداف لحياتي بجد نعمة كبيرة أوي ..ونفسي كل واحد فيكوا يكون عنده هدفه اللي ناوي يحققه مهما كلفه الأمر ومهما كانت العوائق ..وحتى لو هدف ملوش دعوة بالدراسة أو بمعنى أصح لو هدف بعيد عن الحياة المهنية ..بس المهم يكون في هدف أصلاً

شعور حلو أوي إن لما نكبر أقول لولادي ده فلان اللي عمل المشروع العظيم ده كان زميلي وأقلهم فلانة وزيرة الاسكان دي كانت اللي بتعد جنبي وكانت بتصور مني المحاضرة..نفسي كلنا يجي الوقت اللي نفتخر فيه بعملنا ونفتخر ببعض..احنا دفعة واحدة وبكرة((كمان سنتين إن شاء الله))هنتخرج وبرده هنفضل دفعة واحدة ممكن لما نقابل بعض بعد 20 سنة منعرفش بعض بس أنا عن نفسي هفضل فاكرة اساميكوا كلكم علشان لو قابلتكم أفضل مفتخرة إن انتم دفعتي ..

الواحد ممكن يكون له كذا هدف بس أهم حاجه كل واحد يحدد أولوياته ويفضل عارف إن على الأقل لازم يكون عنده هدف في دنيته عايش علشانه وهدف لأخرته برده عايش علشانه ..ومحدش يخجل أبداً من هدفه لأنه شيء شخصي بيعبر عن رغبة داخلية بتختلف حسب شخصية كل واحد فينا ..والأحلى إن كل واحد فينا دايماً يفكر نفسه بهدفه بحاجه بسيطة..مثلاً يكتبه علي الكمبيوتر ويخليه خلفية أو على الموبايل أو يعلقه على ورقة غي غرفته أو يقوله لحد قريب منه علشان من وقت للتاني يفكره بيه و يشجعه ويهون عليه العقبات اللي في الطريق.

في النهاية وحشتوني جداً ونفسي نكون دفعة واحدة بتحث بعضها على الخير دايما و بنتجمع دايماً على الفرح والخير ..

زميلتكم

نورهان

أزيكم يا جماعة ..يا رب تكون الأجازة جميلة علينا كلنا وصيف أجمل (هو حر صحيح أوى بس معلش ) وتكونوا فى أتم صحة وأحسن حال يا رب

أولا أناعايزة أقول انى متابعة جيدة للمدونة من زماااااااان فى 2007 :)..بس كنت متابعة من بعيد! ، باقرا المواضيع ومتابعاها على طول ، واللى خلانى أكتب فى 2009ان للأسف مبقاش فى مدونة أصلا ……

عايزة أقول كمان أنى هكتب على أدى ..مش هتفلسف و لا هفتى ،دى مجرد وجهة نظر..مجرد فكرة حبيت أشارك بيها ، مش هتعجب كل الناس و ممكن متعجبش حد :S.. لا لا ربنا يستر

والفكرة جاتلى من سؤال؟ (هو احنا بنعمل ايه فى حياتنا .. ايه اللى بنعملوا يخلينا موجودين ؟ وازاى احنا موجودين فى حياة غيرنا ؟ وايه اللى يثبت الوجود دة ؟؟ عايز تعرف ازاى انك موجود ،أو إن وجودك فارق من عدمه عند غيرك ، أو إن وجودك دليل على وجود غيرك ،أو ان الحياة لسة بتمشى واحنا لسه عايشين :)… تجربة بسيطة جدا..

انزل من بيتك، هات زرعة صغيرة ..،اهتم بيها ،اسقيها و حطها فى الشمس كل يوم ،بعدين.. سيبها …حاول تنساها يوم ..يومين ،تلاتة لما هترجع بعد كده وتشوف ازاى انها دبلانة وهتموت لو ما سقيتهاش.. هتعرف انك لسه موجود..لسه فى ناس وحاجات محتاجة لوجودك…..:)

فكر …فرحت كام واحد زعلان ، واديت كام واحد شحنة أمل وساعدته يوصل لحاجة بعيدة ، وصالحت مين على مين ، و ما بخلتش بوقتك ليه على ده ؟ ! و فضلت تفكر اد ايه علشان تلاقى لفلان حل لمشكلته ، وعملت ايه علشان تجمع أصحابك و أهلك و اللى حواليك، وعملت ايه لنفسك ؟ وتعبت أد ايه فى شغلك؟ طب وليه عملت كده أصلا !!!!؟؟…

يعنى لو ما عرفتش تشارك أصحابك و أهلك فى حياتهم فى الحلو و الوحش منها ، هتكون ازاى موجود ،… طب مين غير أصحابك و أرايبك هيروح ويجي وراك.. ويدور معاك على حاجات انت بس اللى بتحبها (أحيانا غصب عنهم ):) ..بس علشان مهتمين بيك ..عايزينك تكون مبسوط..

طب اقلب الموضوع و شوفه بالعكس!! طيب لو ما اهتمتش انت بأصاحبك دول !! !مين هيفهمهم غيرك ، ويقدر اهتماماتهم غيرك..:)

اهو المدونة دى مثال مصغر جدا للمشاركة والموال دة كله ! طيب ازاى بقى..؟؟ يعنى مثلا ال73 موضوع اللى اتكتبوا دول عملولنا ايه ؟؟و راحوا بتفكيرنا على فين ، وجمعونا على ايه؟ واختلفنا على ايه؟ ووصلنا فى الآخر لإيه ..:) ؟ يعنى مثلا لما نورهان كتبت (حد ضامن يمشى آمن أو مآمن يمشى فين) حسيت بايه! ، وحلمى فى (حلاميزو) ضحكك أد إيه ، ولما ياسمين قالت (الألم نعمة..) فكرت تحمد ربنا على ايه ولا ايه؟؟؟ ، وسوسة ودودة جابوا فى سيرة كام واحد فينا وضحكونا على نفسنا :)،و عبدالله فى (يبقى انت أكيد فى مصر) استفزنا ازاى و خلانا عايزين نحاول نغير فى كل حاجة و أى حاجة غلط ، و معايدات عبد الشكور فى العيد و رمضان و ردور الناس الجميلة ..( واحنا وانتم طيبين :)) ممكن تفتحوا المواضيع دى دلوقتى .. اقروا التعليقات.. هتفطسوا من الضحك و هتوحشكوا المشاركة جدا

و لما اتجمعنا و قولنا ..(عاوزين نعمل شنط رمضان.) وتولى الموضوع ده عنا مشكورين مها و نجيب و ياسر وناس تانية كتييير والمشجعين الدائمين اللى لو ما لقيتش تعليقهم ..يبقى ما عندكش نفس تكتب تانى !!! هديل ونهى وهدى وهبة عادل وهبة عاطف ومنى طلعت وكريم وأحمد أسامة و اميرة و ناريمان و أميرة أنور ومنى ممدوح و ياسمين سامر و مارينا……. وده ليس على سبيل الحصر بس علشان الناس ما تقفلش الcomputers

افتكروا بقى كنا ازاى متجمعين ، ومبسوطين فى المدونة دى، وازاى شجعنا بعض فى كل ده…..المدونة دى مجمعة أفكار دفعتنا كل واحد بيشارك ويقول رأيه بيلفت نظرنا لحاجات مش شايفينها ، أو حاجات مكناش شايفينها زى ما هو شايفها لوحده ، بيساعدنا نحط صح على حاجة كانت غلط،مش لازم يكون موضوع طويل عريض ممل زى اللى أنا بكتبوا دلوقت بس اكتب رأيك و صلح لغيرك رأيهم ، كدة بقى هنكون أحسن …..وهنبقى لسة موجودين:)

وسلام عليكم …

كل سنة و انتم مسلمين, كل سنة و انتم متجمعين على الخير, كل سنة و انتم بتمام الصحة و العافية
كل سنة و انتم طيبين.. محمد

لنبدا الان المواضيع الكتير,,,,,,

الالمبياد غيرت الـ TV :

فترة الالمبياد فترة ما بعدها فترة, احس فيها بالاستمتاع اكثر من اى فيلم مسلسل اجنبى عربى, وخاصتا لو مصرى بيلعب احساس بالانتماء غريب بكون نفسى اكون فى الملعب واشجع, ولو فى مبارة كرة يد يااااااااه بجنن بشجع وبجرى ولو فى هدف لينا فرحة ما بعدها فرحة و ” العب يا ذكى وصد يا نقيب وصد نقيب جدع ولله لعيب لعيييب ” ….

وفترة الالمبياد احس انى اريد ان امارس اى رياضة – ملاكمة - حمل اثقال - J واخذ مدالية وافرح ماما وبابا ومصر والمصريين ( فى المشمش بس الاحلام شئ جميل )…..

افراح افراح افراح :

اولا اريد ان اقول مبروك لاثنين من هم ؟؟ هم :

نورهان ونسمة فتم بحمد الله خطبتهم وفرحة كبيره جدا لهم كم انا سعيدة بهذان الخبران الحمد لله… ربنا يتمم على خير ان شاء الله وعقبال الجميع …. مبروووووووووووك مبروووووووووووك مبروووووووووووك الف الف الف مبروووووووك … ندعو لهم بحياة سعيدة ان شاء الله ” ربنا يكرمكم يا رب ” …. ” الكلمات عاجزة عن تعبير فرحتى لهم ”

ومبرووووووووووووك للجميع بالنتيجة وان شاء الله الاحسن والاحسن السنوات القادمة ……

اللهم بلغنا رمضان :

رمضان على الابواب … فكيف الحال هل قمتم بالاستعداد ؟؟

فنحن تقريبا فى نصف شعبان نريد العزيمة والهمه واللهم بلغنا رمضان…

ولا تنسوا صيام نصف شعبان …

غفر الله لى ولكم وتقبل الله صيامنا وطاعاتنا ان شاء الله

المواضيع انتهت….

انا اعلم انى لم اكتب جيدا ولكن لا من مشكلة

بدون مقدمات طويلة .. اقدر اقول رجعنا او “عدنا” و العود أحمد
الاتيليه هو اسم الموقع الجديد, تسميه مدونة, مجتمع, ورشة او اتيليه, المهم انها الرجعة التي لا انقطاع بعدها ان شاء الله تعالى.
من زمان في أكتوبر 2007م كان آخر موضوع و كان آخر تعليق و تم اغلاق الموقع بعدها حتى اللحظة للتطوير و التجديد “الفترة مبالغ فيها بشكل كبير” و لكن موضوع الاغلاق كان مهم بسبب تغييرات و تطويرات مهمة, وقتها كانت المدونة قربت تتحول الى سيرك للسبامرز “spammers” و لم تكن هناك متابعة حقيقية.

بداية التطوير و التجديد الفعلى بدأت في ابريل 2008 .. بداية من تصميم الموقع مروراً بنظام ادارة الموقع “wordpress” مش مهم اخر كلمة دي

تسمية الموقع
احترت كتير في مسألة اختيار اسم النطاق “domain” الجديد حيث ان F9arts.com فيما مضي كان سبب في مشكلة مع الناس في موضوع النطق و الكتابة و الربط بينهم.
الاقتراحات المتاحة كانت بين عدة اختيارات و ووفقنا الله في اختيار اسم الأتيليه كاسم معبر عن كليتنا و مجالنا و بيئة عملنا.
Atileh.com هو الاسم النهائي ان شاء الله بدون تغيير, طبعاً بنشكر الكابتن حلاميزو على استلهام الاسم من احد اقتراحاته و اللى كانت Atleehna
الاسم الجديد له محددات بسيطة و هى سهولة الكتابة و قصر الكلمة و التعبير الصحيح الى حد كبير عن كلمة اتيليه المعرّبة, طبعاً Atelier.com كان محجوز من زمن.

التصميم الجديد
تم بداية العمل في التصميم كما ذكرت بالأعلى في ابريل 2008 و الحقيقة ان التصميم تتطلب جهد و ساعات عمل كثيرة و كثيرة جداً كمان للوصول للوضع الحالى.
حيث تم تغيير التصميم خلال مرحلة التطوير ثلاثة مرات او اكثر للوصول للوضع الأمثل او ما آراه مناسب و يليق بعمل من طلبة كلية الفنون الجميلة.
التصميم الجديد كما هو الآن.. اتمنى ان يكون موفقاً ان شاء الله بالرغم من شكله الغير مألوف للبعض “الل عايش على ذكرى التصميم السابق”.. لكن أتمنى فعلاً ان يكون على قدر الجهد المبذول فيه.

ملاحظات مهمة بخصوص التصفح و الموقع
التصفح “Browsing” : احب انوه عن حاجات ممكن تكون مش مهمة في نظر البعض و لكن احقاقاً للحق و اظهار الصورة الصحيحة للموقع,
تصميم الموقع مطابق للمعايير القياسية لتصميم اي موقع على مستوى العالم و هي معايير بتحدد شكل ظهور الموقع على معظم المتصفحات “Browsers” , النقطة هنا ان هناك متصفحات قديمة و المتصفحات نفسها غبية و هي سلسلة Internet Explorer و خصوصاً ما قبل النسخة السابعة IE7 ..و بالتأكيد اخص هنا بالذكر Internet Explorer 6 : اللى بينزل بشكل افتراضي مع ويندوز XP.

طيب انتا ليه واجع دماغنا بالموضوع ده؟ النقطة هنا ان المتصفح ده بيظهر الموقع بشكل غير صحيح جزئياً, طبعا حاولت على قدر المستطاع محاولة انه يكون مناسب و لكن النصيحة هي التحديث للنسخة السابعة Internet Explorer 7 من البرنامج من هنا.
و ان كان من الافضل استخدام من البداية متصفح من افضل ثلاثة و مناسبين و هما FireFox او Opera او Safari
و هذ المتصفحات لا جدال على انها تظهر الموقع و التصميم بالشكل السليم ان شاء الله.
ليه متستخدمش IE 6 ? هذا الموقع فيه كل اللى ممكن تحتاج تعرفه عن المتصفحات الاربعة
savethedevelopers.org
خد من وقتك 30 ثانية و هتعرف ليه :).

النقطة الثانية: الموقع مصمم على ان يكون اقل Resolution لعرض التصميم هو 1024*768, يعنى لو فيه حد قديم بستخدم 800*600 هنقله معلش هتواجه شوية مشاكل!.

نظام الموقع الجديد
كما هو ظاهر فالموقع له طريقة و خطة مختلفة تماماً عن السابق في اقسامه و .. الخ
1. الورشة: او في قول آخر المنتدى و هو صالة الحوار الخاصة باعضاء الاتيليه, هنتكلم في كل حاجة بما فيها الدراسة و اقسام مساعدة المدونين في الكتابة … الخ آخره.

2.التسجيل\الكتابة للجميع: في البداية وقبل كل شئ, لمن لا يعلم, الموقع كان في الماضي بيعتمد على كتابات مجموعة ثابتة من المدونين “مدون:تدوين:كتابة”, لكن من الآن الوضع مختلفاً فالتسجيل متاح لكل الناس طبعا بشروط محددة في صفحة التسجيل اوضحها انك تكون طالب في كليتنا.

كيفية نشر المواضيع
اعتقد ان الموضوع بسيط ولا يحتاج للكثير لتبدأ في الكتابة و لكن اهم شروط الكتابة هي اجادتها و اختيار المواضيع المناسبة و عدم النقل “copy/paste” من المواقع التانية و بالتأكيد في الورشة”المنتدى” هيكون في قسم خاص بمساعدة المدونين في الكتابة, و الباب مفتوح لمن لديه الموهبة ان يطلب قسم او تصنيف خاص به يكتب فيه منفرداً.

طريقة عرض المواضيع بسيطة و هي ان اي موضوع بيتكتب مش بينشر فوراً لتنظيم عملية العرض و انما بيتم وضعة في قائمة المواضيع التي تنتظر النشر .. كل واحد ياخد دوره !

أكيد لازم هنفتكر مع بعض شروط الكتابة و التعليق
http://www.atileh.com/2007/05/hello-world/

هيكون ان شاء الله في صفحة مخصصة بالتفصيل عن شروط و محددات الكتابة و التسجيل: صفحة شروط الكتابة و التعليق ~ مازالت تحت الانشاء.

شارك معانا.. شارك بجد
ممكن تسجل من دلوقتي في الاتيليه و تقدر تكتب لو عايز و تشارك في الورشة بمواضيعك كمان.
اتمنى ان يكون هناك تفاعل و مشاركة من الجميع و اللى يعرف يبلغ اللى ميعرفش

في النهاية اتمنى ان يكون العمل يليق باسم الكلية و باسم طلابها و خصوصاً دفعتنا و ان يكون ربنا وفقنى في ذلك ان شاء الله.

محمد عبد الشكورعرب,
الجمعة 03:50 م, 18 يوليو 2008مـ

و آخر كلامنا ان الحمد لله رب العالمين.
السلام عليكم و رحمة الله و بركاته.

و الحكمة من الجملة اللي فاتت مش على رمضان بس…لأ على كل شيء تقريباً في حياتنا ..

كتيير مننا بيستخبوا ورا أخطاء الأخريين علشان يداروا عيوبهم…و ورا الظروف المحيطة و العوامل النفسية و العيوب الشخصية !!

 أغلبية الناس يا بيركزوا مع عيوبهم لحد ما تعميهوهم عن مميزاتهم و تصيبهم بوباء الاحباط و فوبيا التميز
يا بيركزوا مع مميزاتهم و عيوب الأخرين و دول يا حفيظ عندهم داء الغرور
الأنواع دي معروفة…أو بمعنى أصح ملحوظة بينا و بين بعضينا…اللي مش ملحوظين بقى …اللي لا عارفين مميزاتهم و لا عيوبهم ..أو عارفينها و بيتعمدوا يتجاهلوها …

أو مش بيركزوا ازاي يصلحوها..و على رأي المثل اختلفت الأسباب و الموت واحد…فاختلفت الأنواع و المشكلة واحدة

سواء اللي بيتجاهل مشكلته أو بيركز على جزء منها …فهما الاتنين في مشكلة
مشكلة الناس اللي بتقول معلش و ماكنش قصدي ..و هحاول …و أصل و مأصلش !!

مشكلة معظمنا لما بنحكم على المظاهر …و نحكم بالفشل على تجاربنا حتى لو في ايدينا النجاح…معظمنا قبل ما يقول إن شاء الله هقدر …يقول ده ظلم و حرام و مش هقدر …و ده افترا و مش عارفه ايه …

يمكن زي المشروع الجميل اللي اخدناه بتاع المدرسة…كلنا أول انطباع ده ظلم و ازاي يعملوا كده فينا و مش عارفه ايه..و أنا طبعاً أول اللي بيشتكوا
بس ليه مش بنبوص لموضوع من ناحية إنه تحدي علشان نشوف قدرتنا ..إنها فرصة نسيب الظروف في حالها و نشوف نقدر نعمل ايه من غيرها..

كتير بيعتبروا نفسهم صفر على الشمال …أو لسه الظروف ماديتهومش حظهم ..أو إن عيوبهم هي اللي واقفة في طريق نجاحهم

وقت ما في ناس بتعتبر عيوبها هي نقطة تحول في حياتها و هي السبب في نجاحها
اللي بيبوص دايماً لنص الكوب الفاضي بيفضل طول عمره بائس حتى لو عيوبه دي بجد حقيقية

الشخصيات اللي بتعتبر نفسها صفر على الشمال ..مش عارفة إن ليها قيمة بس في حاجات هي مش مدركاها حاليا

الصفر ده اللي مش بيدي قيمة للواحد…و انا صغيرة كان السبب في إني عرفت اليمين من الشمال !!

و بينا و بين بعضينا الشخصيات الضعيفة و اللي بتعتبر نفسها مهملة …هي شخصيات احنا في حاجه كبيرة ليها…

عيوبنا اللي بنتكسف نواجه بيها اللي حوالينا ..ممكن تكون السبب في إن اللي حوالينا يتشرفوا بينا!!

مش علشان فينا العيوب دي ..لأ..علشان قدرنا نوظف العيوب دي علشان تخلينا أحسن

الانسان اللي بيتغلب على عيوبه بيكون انسان قوي …و من حقه يفخر بانه كان عنده العيوب الفلانيه و قدر يتغلب عليها
وقت مفي ناس بتفخر بمميزات عندها مالهاش أي فضل في وجودها !!

مش معنى كده إن مفيش ناس قويه و عارفه مميزاتها و عيوبها و بتتعامل على هذا الأساس..

بس الفكره بإن أغلبية الناس دي مش بتقدر اللي حواليها و تديه الفرصة….مش مطلوب إنك تتنازل عن حقوقك علشان ينالها الاخرين

بس المطلوب تضيف لمميزاتك ميزة ..و هي ترك متسع يناسب الأخرين

المطلوب إتك تحس بغيرك زي ما بتحس بنفسك…يمكن مش كلنا بنقدر نساعد اللي حواينا بأفعالنا تجاهه

بس نقدر نساعدهم بافعالنا مع الاخرين و تصرفاتنا اليومية..

احساس جميل إنك تكون جزء من حياة غيرك ..بس الأجمل إنك تكون جزء من عملية تطوير فكر اللي حواليك

كلنا فينا عيوب و ناقصنا مميزات…و ربنا خلقنا علشان نكمل بعض …فينا المسيطر و فينا التابع و هما الاتنين بيأثروا في بعض !!

حاسه إني عماله اتفلسف من الصبح…بس هي كانت حبه تخاريف نفسي اتكلم فيها!!

و كل سنة و انتم طيبين